Eccuci à a una nova rientrata ! L’istatina hè statu carcu à evenimenti.
À qualchi ghjornu di l’anniversariu di l’assassiniu di Massoud, u cummandante eroe naziunale di l’Afghanistan, i Talibani sò vultati à u putere in Kaboul, di pettu à l’incapacità di u mondu d’aiutà ssu corciu pòpulu à custruisce è mantene a demucrazia. E donne è tutti i demucrati sò minacciati è a paura empie i cori di a ghjentarella chì cerca à fughje. In u frà tempu, sò torna millaie di salme ingullite in u Mediterràniu, omi, donne è zitelli annegati… A pulìtica di migrazione di l’Auropa ùn hè addattata à a situazione, anderà di male in peghju cù a sorte ingattivita di tanti disgraziati chì fùghjenu a guerra, a miseria… è dumane, i ciambuttamenti climàtichi… A pianetta sana piccia focu di pettu à a sicchina è i venti di u clima chì si riscalda di più in più. Sò millioni d’èttari smariti in un lampu. Dixie fire, u secondu più grande focu di a storia di a California hà brusgiatu quasi 190.000 èttari, struttu 1200 case o stabilimenti, fattu fughje decine di millaie di ghjente è li hà fattu cuncurrenza un antru focu, chjamatu Caldor cù decine di millaie d’èttari brusgiati. In Cabilia marturiata dinù i fochi sò stati tremendi, 90 morti frà i quali 33 spendifochi ! In Grecia, sò 70.000 èttari, àrburi centunarii, case, imprese, bestiame ch’anu brusgiatu. Torna morti è scempii in Turchia è in Sardegna surella. In Francia, sò più di 7.000 èttari arruinati in u Var, duie personi anu persu a vita è una vintina sò state ferite. Ancu in i paesi i più freddi di a Siberia è di l’Antarticu u focu hà sparsu a so malamorte, allora chè in Allemagna, in Bèlgica, in Francia sò timpeste è inundazioni ch’anu fattu disguasti tremendi. Ma, dòrmanu tranquilli i putenti di a pianetta, malgratu raporti di u GIEC di più in più alarmenti ind’è l’indiferenza è a passività di e grande nazioni ! In tantu, e pupulazioni mundiale cuntinuè-ghjanu à esse nutrite di a paura di a pandemia di Covid è u rinculu di e so libertà. Sò millaie in Francia à sfilà in carrughju ma nunda ùn cambia. A ghjente hè spiccata da a puliticaccia, i curnachjoni si ricuperèghjanu a scuntentezza, è u guvernu prufitta di a disunione.
A pandemia cuntinueghja à tumbà ghjente, di più in più ghjòvani… In Corsica, ci hè statu dinù parechji accidenti per via di a divagazione animale, e vacche sò dette culpèvule è i puteri pùblichi ùn sanu cumu regulà u prublema ! O ghjente, sè no ùn ghjunghjemu micca à scioglie capatoghji lucali, cumu sperà vede sciògliesi i grandi prublemi di a pianetta ?
Bramemu chì a rientrata purghjerà nutizie più belle… cume, per un dettu, a prima rientrata di Scola Corsa in Bastia è Biguglia, ssu 6 di sittembre 2021 ! Un evenimentu allegru, infine ! Bona rientrata à tutti ! •
