Cù u riscaldimentu climàticu hà da cresce u livellu di i mari è di l’oceani. U straripamentu di l’acque averà cunsequenze dulurose pè e pupulazioni ubligate d’abandunnà i so lochi per spatriassi. Da quì à a fin’di u sèculu, omu s’aspetta à centinaie di millioni di rifugiati climàtichi. Tutti i cuntinenti anu da esse tocchi. Ha da cresce u livellu di u mare di 50 centìmetri à un metru dìcenu i specialisti pè i 50 anni à vene… è cert’altri, di più in più numarosi, dìcenu ancu chì l’affare s’hà da ingattivisce per vìa d’un effettu d’amplificazione, sin’à 4 o 5 metri di più da quì à u 2100. In u stessu tempu, e cumune liturale sò di più in più pupulate cù una densificazione 2,5 volte di più impurtante chì a densità mezana.
Secondu à e previsioni di l’Insee, 40% di a pupulazione francese hà da campà nant’à u liturale da quì à 20 anni. Ma cumu fàcenu l’omi à ùn tirà e cunsequenze di i drami ch’elli appròntanu ssi custati ? Cumu fàcenu à ùn capisce u perìculu di l’evuluzioni di a nostra sucietà ? U crescimentu di l’evenimenti climàtichi è e so scorte di catastrofe sò puru quì per àpreci l’ochji ! Serà pussìbule, piumboni è saette ! A dannosa timpesta Xynthia in u 2010, e timpeste à repetizioni di u 2013, u 2014, l’uragani cum’è quellu tremendu Irma in u 2017, è oghje ancu si parla di i cicloni mediterraneani, cum’è quellu ch’hà casticatu a Sicilia è a Grècia a simana scorsa… tutti ss’evenimenti ci màndanu messagi chjari. I puteri pùblichi cèrcanu à parà ssi fenòmeni cù mondu piani è strategìe di lotta è di prevenzione… puru, d’un antru latu fèrmanu cecche è sordi uni pochi di puliticanti è amministrazioni, pigliendu misure cuntrarie ! Per parà a cullata di l’acque ùn ferma chè una suluzione astuta è efficace : u rinculu di l’urbanìsimu ! U tràmpalu u più soddu è accerbellatu hè a Lege Liturale aduprata di 1986. Ùn hè arnese per impedisce u sviluppu cum’elli dìcenu uni pochi d’irrispunsèvuli, ma bellu u cuntrariu una lege ch’urganizeghja di manera assinata è demucràtica l’acconciu di u territoriu è l’urbanìsimu. Puru, ogni tantu, è di manera di più in più accanita, omu cerca à addebulisce è ancu à sguassà ssa lege preziosa. O ghjente, piantemu e nostre pazzìe !
Un offensiva hè in cor’di strada torna cù a lege ELAN. L’amendimenti previsti per sbrembà a lege liturale sò periculosi è anu da favurisce torna l’urbanisazione liturale, a densificazione di e pupulazione, vale à dì, pè a Corsica torna, di più spupulamentu ind’è l’internu è u rurale. Sempre più custruzzioni è turìsimu in bord’di mare vanu à l’incontru di e nostre brame di luttà contr’à e derive speculatrice è l’equilìbriu di u territoriu.
A lege liturale ùn deve esse mudificata.
Fabiana Giovannini.
