I dui club fiara di u ghjocu à pallò corsu anu ripigliatu l’intrenamentu. È s’appronta una bella stagione ! Ogni annu sò decine di millaie di Corsi à campà di sta passione.
L’ACA hè statu intesu da a DNCG (Direzzione naziunale di u cuntrollu di gestione di i club), u gendarma di u futbolu francese, è si sà quant’ellu hè duru. Ancu di più pè i club corsi, ùn li risparmia nunda ! Per esse mantenutu in Lega 2, l’ACA deve prisentà guaranzìe da pudè tene u so bugettu ch’o senò serà relegatu in divisione naziunale. U club hà dumandatu un tempu di più da pudè risponde. Serà intesu di novu u 15 di lugliu pròssimu.
Aspettendu, i ghjucatori è u staff appròntanu a stagione di Lega 2. U club hè statu salutatu cum’è migliore centru di furmazione di Lega 2 da a Federazione Francese di Futbolu. Ogni annu, a FFF s’appoghja per ghjudicà nant’à a ziffra di cuntrattu prufessiunale, u tempu di ghjocu in squadra prima, a scularità di i giòvani, e selezzioni naziunali è e raprisentazioni aurupee. Frà i 34 club prufessiunali, l’ACA hè classificatu à l’ottèsima piazza, è à a prima piazza di i club di Lega 2 ! Sciaccamanate à elli ! Ghjè una bella prova di u travagliu fattu è di u so impegnu in a furmazione di a giuventù. « Ssa classìfica palesa u travagliu fattu. U prugettu di furmazione hè cuncretu, demu à a noscia giuventù una scenza d’evoluà di manera prufessiunale. Semu fieri d’essa i primi pè a scularità è u tempu di ghjocu chì sò i dui criteri i più impurtanti » dice u direttore di u centru, Patrick Leonetti.
Per Johan Cavalli, u cuurdinatore spurtivu, « hè u risultatu d’una strategìa messa in ballu quattru anni fà, avemu messu in piazza un veru ponte trà a furmazione è i prufessiunali. Avemu una filusufìa cumuna è precisa per tutte e categurìe di giòvani, cù un spìritu è valori impurtanti. Oghje n’arricugliemu i frutti. »
U Sporting Club di Bastia hà francatu a tappa di a DNCG. U club cuntinueghja à rinfurzà a so struttura. Sustegni novi d’imprese èntrenu in u capitale di a SCIC (Sucetà cuuperativa d’interessu cullettivu, chì ghjè un uriginalità in u futbolu francese) è li permette di rinfurzà a squadra prima, sìa 25 % di un bugettu di 13,8 M€. « U scopu hè di mantene a nostra cumpettitività, rende u club più forte è vende ghjucatori solu sè no vulemu vende » dice u presidente Claudiu Ferrandi.
U SCB hà lanciatu a so campagna d’abbunamenti è conta già più di 2000 abbunati in duie settimane.
Hà ziffratu una cunvenzione cù a CCAS (centru cumunale d’azzione suciale) in u quadru di u prugettu Sulidarità turchina. Cusì ogni abbunatu pò dà 10 € in più da fanne prufittà ghjente ch’ùn ponu abbunassi da sè stessu. Cù sti soldi, abbunamenti seranu offerti da a CCAS
à ghjente in u bisognu, da sparghje a passione turchina cù tutti ! Bellìssima iniziativa !
Dapoi parechji anni, u club hà più chè un prugettu spurtivu, un veru prugettu suciale d’integrazione in a vita di Bastia è di tutta a cummunità d’agglumerazione da rende u futbbolu è e so gioie accessìbule à tutti. L’abbunamentu Trenu (solu 51 € per tutta a stagione) hè dinù in piazza per ghjunghje à u stàdiu in securità è in un ambiente festivu.
A CAB hà tenutu i so ingagiamenti.
A stagione hà da ripiglià in un stàdiu Armand Cesari trasfurmatu è quasi compiu. A tribuna Ueste hè compia è cuperta. A tribuna Este hè dinù compia è principia à esse cuperta. Infine, u Sporting pò gode d’un veru stàdiu à livellu di e so ambizioni ! È st’ambizioni ùn sò piattate : tutt’ognunu da dirigenti à ghjucatori, spunsori è sustenitori, brama a Lega 1 quist’annu. Fùssila puru !
Aspettendu u primu macciu serà un derby Aiacciu/Bastia ! Bramemu chè i sustenitori feranu valè solu e cuncurrenze spurtive per dacci una bella festa di u futbolu corsu. •
