S’hè spentu Antone Angeli d’Abbazia di u Fium’Orbu, u 29 di sittembre 2019. Era u fratellu di Michè Angeli, di Martina, Ghjuvanna, è Maria Ròsula. Era u babbu di Ghjuvan’Marcu, Maria Pasquale, Maria Stella è di Filippu Antò.
À tutti, fratellu, surelle, figlioli, figliulini, nipoti, Arritti manda cunduleanze afflitte è fraterne.
Antone era un militente di e prim’ore di l’ARC. Un militente curagiosu ch’hà sappiutu dà di pettu à i barbusi di u Statu francese quand’ellu ci vulìa à affruntà l’inghjustizie è e malfatte parigine. Èranu tempi duri induv’ellu ci tuccava à guardà l’imprese ch’èranu in mira da e milizie di FRANCIA. Sò stati cusì decine d’attentati contr’à l’imprese di i naziunalisti corsi, frà e quale Arritti hè statu anch’ellu parechje volte in mira.
Antone avìa creatu quarant’anni fà a sucetà I Fratelli Angeli, cù u so fratellu Michè, in Borgu. Tremindui fecìanu u pane è u si vendìanu in i paesi di u Borgu, Lucciana è tuttu u circondu ; vita di stenti è di sudore, ma vita corsa di generosità è di fratellanza.
Hà vulsutu dopu avvicinassi torna di u so Fium’Orbu nativu è, lachendu l’impresa à Michè, hà stallatu a so panatteria in I Prunelli in bor’di strada induve tutt’ognunu si piantava à pigliassi un cafè è cumprassi u so pane.
Antone accugliava è si piacìa à chjachjarà, u surisu sempre in bocca è l’ochji spampillulenti.
Riposi in pace o Antò. I t’amichi ùn si scurderanu di tè.
