Dopu à i sonnii è l’inganni di a mundialisazione chì ci prumettìa mondu mare è maraviglie, omu s’accorge chì furtuna è dulcezze sò scarse di pettu à u prezzu à pacà di a deculturazione è l’uniformisazione.
Tandu, còntanu e ràdiche è u locu induv’ella nasce a surgente. I disprezzi di u liberalìsimu chì minàccianu a salute, l’ambiente, i diritti di l’omu o di i pòpuli, àprenu di più in più l’ochji à a ghjente. U travagliu di l’associi ci indita quant’elli pèsanu sse derive nant’à a sucietà.
I lobby ci affòcanu. E multinaziunale di u prufittu scàvanu i fossi è sò nemiche di u ben’esse cullettivu. U riscaldimentu climàticu vene à fà cresce ssa presa di cuscenza ch’omu deve rivene nant’à u so territoriu per priserve u s’avvene. Cìrculi corti è prussimità vènenu à prò di e nostre autunumìe alimentarie, energètiche, ecunòmiche chì fèrmanu sempre à custruisce… A terra induv’omu nasce ùn hè più quella à fughje per inventassi una vita, ma bellu u cuntrariu induv’omu pò assicurala. In ssa spècia di riacquistu di ciò ch’omu hè, l’identità, a cultura, a lingua, ùn sò più fora d’usu o à l’anticogna, ma mudernità ! È ssa rivuluzione ùn hè d’oghje. À livellu di e vite di i pòpuli è di e nazioni, sò evuluzioni à longu andà. U svegliu, in Corsica, per un dettu, hà digià più di 50 anni, cù u tempu di u riacquistu di a perioda cuntempurànea. Ma si puderebbe parlà di u diciottèsimu ch’hè statu anch’ellu una presa di cuscenza magnìfica, per disgrazia furia in furia affucata. U parapiglia è tene di u mondu in cumbugliu, hè guerra psiculògica, culturale, ecunòmica, sucietale ch’omu deve affruntà per fassi omu. Hè per quessa chì a nostra lingua hè rampale. Bisognu à parlala, à scrìvela, a lèghjela, à tramandala. A lingua hè lea. Ghjòvesine cum’è tràmpalu è spiccanza hè ghjastema. Quandu l’eletti di l’Assemblea di Corsica, principiendu una sessione, rispòndenu à a chjama di u so nome « sò quì », «presente », « iè »… ùn hè estru o scapricciata. Hè sìmbulu forte d’una vuluntà d’esse. È vede i nostri ghjòvani riprudùceli hè magnìficu. Frasturnali hè sbagliu. U mondu hè disòrdine è trambustu. Omu abbisogna di riferimenti è d’appoghji. A nostra identità hè puntellu da arrampicassi è dà rispiru à e nostre andature cullettive. Esse d’una terra, d’un locu, spàrghjesi cù i soi per dà di pettu à l’assalte è l’inghjulie. Eccu u sgnificatu di u « sò quì ».
È voi, site quì ?
Fabiana Giovannini.
