In ssu mondu in cumbugliu induve mènanu e guerre, ci hè un paese abandunnatu à a so sorte induve e donne sò forse e più marturiate di u mondu. Affucate, càmpanu cum’è schiave è ogetti.
Di pettu à a gattiva sorte dapoi tempi landani, l’omi fùghjenu. Di pettu à i Talibani pèssimi è salvàtichi, l’afgani pròvanu à fughje.
Sonita Alizadeh hè nata in u 1996 ind’una famiglia di ottu zitelli in Afaganistanu. Quand’ella era chjuca, i so parenti anu pigliatu e strade di l’esiliu, pruvendu à scappà di pettu à a ripressione, marchjendu ghjorni, settimane è mesi in u gattivu tempu, piossa, neve, freddu, fame, quasi 1000 chilòmetri à marchjà. Sò ghjunti sin’à un campu di rifugiati in Téhéran. Senza carta, Sonita ùn pudia andà à a scola, impiecata cum’è serva à pullisce i cabinetti. Hè cresciuta cusì, senza ricunniscenza, pruvendu à sopravive. Un ONG insignava à i giòvani, hà imparatu à leghje è hà scupertu a puesia induv’ella hà truvatu un agrottu. Ma a lege iraniane impedisce à e donne di cantà in pùblicu, u silenziu li era impostu. Senza soldi, i so parenti avìanu pruvatu à vèndela in matrimoniu à l’età di 10 anni, ma vultati à u putere i Talibani, a fùghjita in Iranu l’hà salvata. À l’età di 16 anni, li spiècanu torna ch’ella deve vultà in Afaganistanu induv’elli dèvenu maritala da pudè pacà u matrimoniu di u so fratellu. Ella, era innamurata di a mùsica è di a puesia… U so mudellu era u raspatore Eminem ch’ella avia intesu à a ràdiu quand’ella nettava u mullizzu di a ghjente. Ùn capìa micca l’inglese ma avia sentitu a rivolta, e brame di u rap in u rìtimu chì li pichjava in pettu. « Hè què chì devu fà » avia pensatu a giuvanotta per fughje a so sorte. S’hè messa à scrive. Hè cusì ch’hè natu Daughters for sale… surelle da vende… prima, sussurèndula, per via di u perìculu, ma, dice Sonita, « a mo voce duvia esse intesa ». Raspendu contr’à a charia, raspendu pè e donne, raspendu per cambià a so sorte, Sonita hà testimugnatu. È sò e manu tese chì li anu permessu di fassi sente. A realisatrice iraniana Rokhsareh Ghaem Maghami li fece un clip è u sparghje nant’à YouTube. Cù più di sei millioni di viste, ghjurnalisti, urganisazioni di difesa di i diritti di l’omi, sèntenu a so voce… Sonita diventa un imbasciadrice di a sorte di a donna afgana. Hè minacciata di morte. Ma ùn si tace. U gruppu Strongheart l’aiuta à fughje in Amèrica induv’ella ottene una borsa è face stùdii à u liceu di l’Utah po à l’Università di Washington DC è u Bard College di New York induv’ella studia i diritti di l’omi. Invitata à l’ONU, testimogna torna, di pettu à Nobel di a Pace è capi di Statu. Scumbatte. Cuntribuisce à sviluppà un prugramma contr’à u matrimoniu di i zitelli. A s’amica realisatrice face un documentariu di a so stòria, chì vince u Grande Premiu di a Ghjuria à u Sundance Film Festival è altri premii in u mondu sanu. In 2020, hè numinata pè u premiu Women Building Peace. Cù u tempu, i so parenti li anu pardunatu a so disubbidienza. Hè stata forse a so più bella vittoria… ella chì dicia « sè possu cambià l’avisu di mamma, possu cambià u mondu »…
Ogni duie seconde in u mondu, una fèmina di menu di 18 anni hè maritata contr’à a so vuluntà. Sonita hà sceltu un antr’avvene è canta u dirittu di e donne, raspa u so furore è a so vuluntà di cambià a so sorte. •
