Arritti hà un pocu parlatu a settimana scorsa di l’associu Les Uns Visibles, ind’è u so conturesu di u cullochiu di a Cuurdinazione di lotta contr’à e sclusioni (CLE) chì s’hè tenutu in Aiacciu u 28 d’ottobre scorsu.
L’associu hè statu creatu u 30 di nuvembre di u 2015 in Aiacciu da Florence Vandendriessche è Jean-Michel Tatin, addittologu, raghjunti da uni pochi di benevulenti in u circondu aiaccinu. Travàglianu tutta l’annata à porghje aiutu à ss’omi è sse donne di u carrughju ch’ùn si vèdenu micca… L’associu s’hè impegnatu assai durante a crisa sanitaria di u Covid, ch’hè stata ancu di più gattiva pè a pòvera ghjente. In una sucietà di strazii è malanni, pesa a sulitùtine è cù ella si cerca à fughje cù droga, alcolu, sigaretta, medicamenti… « Ci tocca à piglià a misura di u prublema di l’addizzione chì ci porta ver di una generazione sacrificata sè ùn femu nunda » dice Jean-Michel Tatin. « L’addizzioni sò una fallata versu l’infernu : pèrdita d’un impiecu, misèria, cunflittu familiale, precarità, sclusione, a nostra bella ìsula hè in traccia di sfundassi in ssu cìculu infernale. Chì femu ? Nunda. Solu qualchi associu s’interèssanu à stu prublema chì cresce frà i giòvani, è micca solu i giòvani » s’addispera l’associu…
Les Uns Visibles cùranu dunque e personi e più dèbbule. Travàglianu cù un retale d’attore di terrenu di a lotta contr’à a precarità in Corsica. Per vìa di cunsiglii, urientazione, cuntatti telefònichi, s’impègnanu à u cutidianu, ponu avè dinù intervenzioni d’urgenza nant’à u terrenu. Fàcenu giri per truvà a ghjente in carrughju, dalli un caffè o una suppa calda, circà u cuntattu, da ch’elle accèttinu di curassi, omancu d’andà in un alloghju d’urgenza, quand’ellu ci n’hè. Perchè a Corsica manca d’alloghju d’urgenza disgraziosamente.
« Fora di tutta appartenanza pulìtica o religiosa, purghjimu a manu à e personi senza tettu, senza indirizzu, à e vìttime di sclusione. Demu aiutu, cunsigliu à e famiglie chì e sustènenu. Sensibilizemu è accumpagnemu e personi chì sòffrenu d’addizzione. Cuntattemu in situazione d’urgenza e strutture medicale, suciale, di ghjustizia è pulìtica, da ch’elle mèttinu in ballu l’azzioni necessarie. Partecipemu à incuragisce l’azzioni sulidarie è citatine. » Eccu cum’ellu si prisenta l’associu.
Les Uns Visibles partecipeghja tutti l’anni à u cullochiu di lotta contr’à a puvertà, urganizatu da a CLE. Tene dinù gruppi di parulla pè a ghjente chì lotta contr’à l’addizzioni, alcolu, sigaretta, droga. S’adunisce tutti i luni à 4 ore dopu meziornu à a Maison des Quartiers di e Canne in Aiacciu, « tuttu principia cù una tazza di caffè per accumpagnà è aiutà quella o quellu chì ne hà bisognu » testimogna l’associu.
« A puvertà cunduce à a precarità è a sclusione, a pèrdita di riferimentu, infine u carrughju è l’addizzioni. Per cunduce a persona à curassi, ci vole a pazienza, u tempu, ci vole à creà lea è sopratuttu ùn cappià nunda… s’ellu ùn hè oghje, serà dumane un ghjornu più bellu, cuntinuate à impegnavi, senza ghjudicà, cù solu un pocu d’amore di l’altru… »cusì chjama Jean-Michel Tatin à aiutà quelli ch’ùn si vèdenu. •
Infurmazioni : unsvisibles@gmail.com – 07 86 53 27 88
Facebook : lesunsvisibles
Helloasso : association les uns visibles