Face 20 anni avà chì a Cuurdinazione interassuciativa di Lotta contr’à l’Esclusioni scumbatte per fà rinculà a puvertà. Adunisce una quindecina d’associi : Fratellanza, Avà Basta, Avà Simu, Croix-Rouge, Fraternité du Partage, Falep, Falepa Corsica, Entraide Protestante, Hors Normes, Les Uns Visibles, Médecins du Monde, Présence Bis, Restos du Cœur, Secours Catholique, Secours Populaire.
A CLE hè nata in u 2004 in Aiacciu, quand’uni pochi di disgraziati sò stati cacciati da u squatt Alban induv’elli campàvanu a so vita di misèria.
À l’èpica, l’associ luttàvanu ugnunu in u so latu per aiutà sta ghjentarella, si sò aduniti in giru à Francescu Pernin, presidente di Médecins du Monde in Corsica, per travaglià inseme è dassi di più pesu. Cusì, in u 2013, a CLE hà apertu un alloghju ufficiale di notte in Aiacciu cù u sustegnu di u Statu, a cumuna d’Aiacciu, u Cunsigliu generale suttanacciu. Hè statu un prò per tutta a regione, à tal’puntu chì associ di u Cismonte l’anu raghjunta in u 2015 da pudè cuurdunnà anch’elli i so sforzi per risponde à e dumande suciale. Cù stu sèriu è stu travagliu, a leghjittimità di a CLE hè cresciuta è hè diventata l’interlocutrice di a misèria pè e Stituzioni statale o regiunale. In u 2014 hà travagliatu cù a Cullettività territuriale nant’à a Carta regiunale di lotta contr’à a puvertà, documentu leatu à u Padduc. Dinù parechji stùdii nant’à i mecanìsimi di a misèria li sò dumandati da u Statu, a Cullettività di Corsica, cumune o cumunità di cumune, da pudè mette in ballu pulìtiche suciale in cuerenza cù i bisogni di a pupulazione.
Frà l’azzioni cundutte, un cullochiu si tene tutti l’anni à tempu à a Ghjurnata mundiale di a misèria, cù parechji intervenenti per prupone suluzioni strutturale è sorte di stu fragellu ch’annega un quartu di a pupulazione corsa. A CLE chjama à un analisa sistemica di u prublema, attacchèndusi à tutte e càuse, ecunòmiche, suciale, culturale, sucietale. Agisce nant’à e càuse à tempu ch’omu s’attacca à i sintomi hè a sola manera di cuncepisce arnesi addattati è efficaci dice a CLE.
U mancu d’alloghju, di mubilità, di lea suciale, d’impiecu, d’alimentazione, d’educazione, di salute… face ch’omu rinuncia è ssu rinunciamentu hè tremendu. Si rinuncia à curassi, à cumunicà, à infurmassi, à cultivassi, si rinuncia à i so diritti suciale, à a vita cìvica, à a ghjustizia, eccèttera. Omu ùn si sente più cuncernatu da a sucietà. Si casca ind’è a sulitùtine, l’alcollu, a droga, a viulenza. « Simu torna una volta cunvucati da a misèria. A puvertà ci hà dichjaratu a guerra » dicìa pocu fà Francescu Pernin. « A puvertà cresce. I sciffri di l’Insee a ci dìcenu tutti l’anni. Ciò chè no femu ùn basta micca. Ci tocca à adunisce i talenti, da chì a puvertà rinculi. Adunisce tutti l’attori in giru à una vera strategìa contr’à a misèria » hà dettu torna u duttore chjamendu à una mubilisazione generale contr’à a misèria. Sustenìmulu. •