« Una terra, un pòpulu, un avvene », dice u so slogan, a Squadra Corsa hè un associu creatu in 2009 per cuncretizà ufficialmente a selezzione naziunale corsa di ghjocu à pallò. Ma a brama ricolla bellu di più luntanu.
A prima selezzione corsa di ghjocu à pallò si face in u 1963. I Corsi urganizèghjanu un macciu contr’à Nizza vintu 1 à 0, per sustene e famiglie di e vìttime di a catastrofa di Monte Renosu accadutu u 27 di dicembre 1962 (accidente d’aviò).
A selezzione corsa ùn hà nisun caràtteru ufficiale è a Lega corsa di ghjocu à pallò cum’è a Federazione Francese di Futbollu làscianu fà. Megliu, in u 1967, u 27 di ferraghju, a Francia vole appruntassi à affruntà a Rumanìa in cumpetizione internaziunale. Tandu e squadre aiaccine è bastiaccia ghjòcanu bè è u famosu Just Fontaine l’hà rimarcatu. In grazia à u ghjurnalista Vittoriu Sinet, i Francesi li dumàndanu d’adunisce una selezzione di ghjucatori corsi per appruntà a squadra francese ! U macciu, omu si ne parla ancu avà. A Corsica hà vintu 2 à 0 in Marseglia di pettu à più di 22.000 spettatori. Stèfanu Sansonetti è Ghjuvan’Petru Serra màrcanu i punti.
Dopu, più nunda o quasi, un macciu ogni tantu, cum’è contr’à a Juventus di Torino (0 à 0) per sustene e vìttime di a catastrofa di Furiani in 1992.
In u 2009, l’affari divèntanu sèrie cù a Corsica Football Association creata da Dédé Di Scala è Lucianu Felli chì mèttenu in ballu una cumpetizione pròpia : a Corsica Cup.
À pàrtesi di ssu mumentu, a Squadra Corsa ghjoca di manera regulare, contr’à u Congo chì si pripara à a Coppa di u mondu di ghjocu à pallò, a Brittagna, u Paese Bascu sud, u Gabon, u Togò, u Burkina Faso, a Guyane, a Guadaluppe, a Martinica, a Sardegna, a Sicilia, Malta… è ùn face figurazione, postu ch’ella hà suvente vintu a Corsica Cup. Un macciu memurèvule hè statu u scontru contr’à una nazione aurupea, a Bulgarìa, allora 46a à u classamente FIFA ! I Corsi vìncenu 1 à 0 in u 2011 !
I criteri per sceglie i ghjucatori hè a so nàscita in Corsica o a so urìgine corsa per vìa di a so mamma è u so babbu, ch’elli ghjòchinu in Corsica o in altrò.
I so culori sò quelle di a bandera mora : biancu è neru, cù a bandera di Paoli di u XVIIIu stampata in pettu. L’anzianu capitanu di u Sporting Club di Bastia, Yannick Cahuzac, hè l’attuale intrenore di a Squadra Corsa. Hè figliulinu di quellu ch’hà purtatu u Sporting in finale di a cuppa UEFA, Petru Cahuzac, in u 1978.
Pocu fà, una cunvenzione hè stata ziffrata cù I Chjami Aghjalesi da purtà u so sìmbulu nant’à a maglietta ufficiale è cumpone un cantu à a gloria di a squadra.
Disgraziosamente, a Squadra Corsa ùn hè ricunnisciuta da a FIFA (Federazione Internaziunale di Futbollu Associazione) è da a FFF (Federazione Francese di Futbollu) ch’ùn ne vòlenu sente parlà. U 21 di sittembre 2018 l’Assemblea di Corsica adopra una muzione chì dumanda à a FIFA d’accettà st’adesione. Ma ùn ci hè manera, u presidente Noël Le Graet dice di nò !
U scopu ferma dunque ssa ricunniscenza à u livellu di a FIFA o di l’UEFA, da pudè ghjucà cumpetizioni ufficiale. Ùn hè un sònniu… L’Ìsule Feroé, Cipria, Malta, l’ìsule Samoa, Tuvalu o Vanuatu in u Pacificu, sò ricunnisciute, perch’è micca a Corsica ? •
Cunttati : www.facebook.com/squadra.corsa.ufficiale