L’Aiutu Studientinu hè statu creatu in u 2011 da i sindicati studientini per luttà contr’à a precarità annant’à u Campus di l’Università di Corti. L’associu ùn face pulìtica, agisce di manera disinteressata è fraterna. S’urganizeghja à traversu un magazinu sulidariu induve i prudutti sò gràtisi pè i studienti in grande difficultà. A buttega hè stallata à u senu di a cità universitaria è offre prudutti di prima necessità. Funziuneghja in grazia à i doni di i particulari, di l’imprese, di i sindicati studientini. Urganizeghja di manera regulare « operazioni caddì » in i grandi magazini. « Mettimu parechji caddì davant’à e casce di u Casino di Corti è distribuimu stampini per cundunce a ghjente chì va à fà e so corse à cumprà un pruduttu o dui per noi, da chè no pòssimu dopu mètteli à dispusizione pè i studienti in difficultà » spiècanu i so rispunsèvuli.
Per « Natali sulidarii » , i so membri vanu ind’i cumerci curtinesi da fassi rigalà prudutti alimentarii ch’elli impachittèghjanu per fanne rigali à i studienti precarii. Listessu per ogni uccasione, cum’è pè « a musetta di Pasqua ». L’associu urganizeghja dinù veghje in u ristorante universitariu di u CROUS, è serate à tema cum’è e « Serate paste » o e « Serate migliacciole » (creppe). U scopu hè di fanne prufittà un màssimu di studienti ind’un ambiente festivu, di fraiutu è di sulidarità, chì mette l’azzione suciale à u senu di a vita universitaria.
Cù u tempu, l’Aiutu Studientinu s’hè accortu chì i bisogni ùn èranu solu alimentarii, ma pè i prudutti sanitarii, scarpi, vestiti, o pè e dimarchje amministrative… Ci rispòndenu sempre in grazia à i doni è l’aiutu di a ghjente è di l’imprese. L’Uffiziu di l’ambiente hà rigalutu urdinatori chì sò imprestati per l’annata à i studienti ch’ùn ne anu micca. A Fundazione di l’Università, l’Università, a MGEN, u Lions Club è mondu associ o urganìsimi l’aiutanu… In grazia à i doni di prudutti freschi di Casino è U Express, l’associu pò tene una permanenza apposta pè u frescu tutti i sàbatu. U magazinu sulidariu ellu, hè apertu i marti è i ghjovi da 5 ore à 7 ore di sera ind’un lucale imprestatu da u CROUS. Malgratu a gratuità messa in ballu à u Restau U cù l’aiutu di a Cullettività di Corsica, a frequentazione di u magazinu sulidariu hè cresciuta. Vale à dì chì ci vole à fà di più pè i studienti precarii. Dice u presidente di l’Aiutu Studientinu, Ghjuvan’Dumènicu Bugnani, « a precarità tocca di più in più studienti è giòvani corsi chì temìanu à vene ind’è u passatu, è chì fràncanu u passu oghje. Certi palèsanu ch’elli vòlenu piantà i studii per circà un travagliu perchè li costa troppu caru, sopratuttu in Corti. Per un dettu, i giòvani di l’INSPE dèvenu andà in Borgu o in Aiacciu pigliendu a vittura tutti i ghjorni, manghjendu culandi, è vistu u prezzu di l’essenza, hè diffìciule per elli ».
L’Aiutu Studientinu face un travagliu impurtantìssimu. Hà bisognu di sustegnu. « Impegnu è sulidarità per un avvene fraternu »… Hè a missione ch’ellu s’hè datu è a chjama ch’ellu lampa à tutti ! •
Infurmazione è cuntatti : aiutustudientinu@gmail.com o www.facebook.com/aiutustudientinu