Avà Basta hè natu d’una presa di cuscenza di pettu à i prublemi di razzìsimu è di zenufubìa. Hè statu fundatu da l’anziana depurtata Natale Vincensini. Natale entre in a resistenza à l’età di 15 anni. À 17 anni, hè arrestata da a Gestapò, torturata è dipurtata in u campu di donne di Ravensbruck. Un annu dopu, di maghju 45, ghjunghje à scappà durante a marchja di a morte. Natale hè una cumbattente è tutta a so vita hà militatu pè a ghjustizia, a demucrazìa, i diritti umani. In u 1985, adunisce 500 personi è fonda u cullettivu antirazzistu Avà Basta per luttà contr’à tutte e discriminazioni.
Natale Vincensini ferma presidente d’onore di u cullettivu ch’hè presidatu oghje da Ghjiseppu Maestracci.
Avà Basta s’occupa di dimarchje amministrative, informa è cunsiglia a ghjente discriminata per vìa di u so culore di pella. Sustene dinù i disgraziati, è sò suvente i migranti i più pòveri è maltrattati in a pupulazione. L’associu l’informa nant’à i so diritti è i so duveri da ch’elli pòssinu integrassi in a sucietà. Intervene dinù in e scole, cullegi è licei, da sensibilizà i giòvani à i prublemi di razzìsimu. Travaglia cù d’altri associ umanitarii chì lòttanu contr’à e discriminazioni è per l’inserzione di i migranti. Organizeghja furmazioni, scontri, viaghji, scàmbii, da avvicinà e cumunità.
U so aiutu s’indirizza à « tutte e personi in difficultà cù l’amministrazioni, in situazione di precarità o chì scòntranu prublemi suciali o di razzìsimu. Pè u più l’immigrazione… e personi senza carta, piazzate in retensione amministrativa o quelli chì l’aiùtanu. »
Dice a Chjama pè a creazione d’Avà Basta : « Parchì nantu à issi spondi ci scalèdinu ind’i sèculi passati, cum’è tanti maròsuli, i pòpuli di u Maditarràniu sanu sanu…
Parchì l’omu ci anu criatu, à u crucivìa di culturi parechji, un cantu prufondu, è anu sapiutu intigranni è tènani l’accenti più landani ind’una sprissioni spùtica…
Parch’elli si scòntranu ancu oghji in quista a tarra u sviluppu è u sottusviluppu, l’esiliu è u vultà, l’Auropa è l’Àfrica, a ricchezza è a paura, a spiranza è u ricusu…
Parchì a Stòria calchì volta ùn ci sà chì strada piglià, trà a vulintà d’essa sè stessu è l’angoscia d’avè da fà i so scelti…
Parchì, più vicinu à a situazioni, sò mantinuti à posta in Corsica l’ambiguità è a bucìa è danu u so significatu veru à u razzìsimu d’ogni ghjornu…
Parchì certi muvimenti d’ispirazioni razzista pari ch’elli ci acquìstinu puteri di più cà altrò…
Parchì i risposti à issi intarrugazioni si ponu truvà in parti ind’a tistimunianza ch’ellu tocca à i Corsi à purtà ind’a lotta contru à a intullarenza, u disprezzu è l’alienazioni…
Ci pari nicissaria di tistimunià quì, è di modu particulari, contru à u razzìsimu. » •
Cuntatti è sustegnu : http://www.avabasta.com