L’associu Cambià Avà hè statu creatu d’aprile 2021. U so scopu hè di difende e vìttime di a divagazione di l’animali d’allevu, a so presa in càrica da i puteri pùblichi, è a messa in ballu di misure pulìtiche da regulà stu prublema gravu di salute pùblica.
A so presidente, Marilina Taddei, hè stata gravamente ferita à e gambe dopu à un attacca di vacche à cantu à a so casa, vicinu à l’uspidale di Bastia u 7 di nuvembre 2020. 8 mesi d’uspitalisazione, mondu operazioni per circà di rimette i so ghjinochji in piazza, Marilina hà persu u so travagliu è a so vita hè stata ciambuttata, ciò chì cunduce à prublemi finanziarii, n’hà persu ancu a so casa… di sicuru esìstenu l’assicuranze, a securità suciale… ma ùn prevèdenu micca tutte e cunsequenze finanziarie, murale, psiculògiche, suciale… è Marilina s’hè in fùria accorta chì numarose èranu e vìttime d’accidenti cù animali in divagazione, è chì tutte sse vìttime campàvanu i stessi guai.
Cù un paghju d’amichi, hà creatu Cambià Avà per fassi sente. « In grazia à i mo amichi aghju trasfurmatu st’accidentu orridu in qualcosa di pusitivu cù st’associu, pruvendu d’adunisce e vìttime per fà chì i puteri pùblichi tròvinu suluzioni à stu fragellu ». U so scopu ùn hè di pigliàssine à l’agricultori o à i merri, bellu u cuntrariu. Dice torna a so presidente : « Sè noi ci’arrizzemu oghje in un associu, ùn hè micca per entre in guerra ! Ma à u cuntrariu, cerchemu i mezi è e manere per truvà e sfarenti suluzioni cun tutti. Sta dimarchja ci purterà à truvà un pianu di salvezza di sta calamità. Per quessu avemu fattu sta chjama à l’eletti di a corsica sana. »
Cambià Avà dumanda un ricensu di tutti st’animali in divagazione, inchjustrali, curali s’elli sò malati, è fà ch’elli sìanu dopu rimessi à agricultori capaci d’occupàssine cum’ellu si deve. Ss’animali, abbandunati anch’elli, màncanu di curamenti è di nutrimentu, divèntanu salvàtichi in i cumpurtamenti è s’avvicìnenu di i lochi urbanizati. Èntrenu in e cità, sin’à in Bastia è in Aiacciu, è fàcenu disguasti. Hè u risultatu d’una pulìtica agrìcula di rèsitu è micca d’un agricultura di pruduzzione. Si capisce ch’in i paesi ghjè una manera di mantene un pocu di vita ind’è l’interiore ma ssu sistema di prima à a vacca cunduce oghje à circa 25.000 animali abbandunati ind’è a machja in Corsica. Sò quessi quì, di paura, per prutegge i so chjuchi o ancu di gattivezza, chì vènenu à attaccà turisti, paisani, vechji o giòvani chì spassighjè-ghjanu ind’è a machja. Suvente l’animali si tròvanu ancu nant’à e strade è pruvuchèghjanu accidenti gravi. Ùn si còntanu più i morti nant’à a strada…
Cambià Avà vole cunduce i puteri pùblichi à adunisce tutti l’attori capaci di regulà stu prublema : Cullettività di Corsica, Statu, eletti lucali, agricultori, veterinarii è tutti i servizii cuncernati. Ci vole à mette in ballu règule nove, ci vòlenu mezi. Ùn hè micca pussìbule di regulà u prublema senza mubilisazione di tutte l’istituzioni cuncernate. Hè ciò ch’ellu dice st’associu ch’hà u mèritu di pone u dibàttitu. Ch’o sinò, l’animali in divagazione cuntinueranu à multiplicassi… è più s’aspetta è più sarà diffìciule di truvà suluzioni. •
Infurmazione : www.helloasso.com/associations/cambia-ava