A Lega di i Diritti di l’Omu in Corsica agisce cum’un associu pulìticu chì porghje aiutu à quelli ch’anu i so diritti sprezzati : i strangeri, i prigiuneri, i precarii… Hè leatu à l’azzione di a Lega di i Diritti di l’Omu in Francia è in u mondu, ben Intesa, ma cù a so pròpia autunumìa d’azzione.
A LDH Corsica hè un attore di a sucietà civile corsa, ch’intervene in u mondu pulìticu, ricuniscendu l’esistenza di u pòpulu corsu, è u so dirittu à custruìscesi u so avvene. Ricunosce u dirittu à una citatinanza corsa « parte di u singulare, andà versu l’universale, eccu u sensu primu di l’impegnu di i membri di a Lega corsa » dice un raportu internu à a Lega chì spieca l’uriginalità di st’associu. « Pè a sezzione di Corsica, sviluppà a demucrazìa in Corsica, affirmeghja l’esistenza di u pòpulu corsu è custruisce a sucietà pulìtica ».
A LDH Corsica si mubilizeghja dinù contr’à e viulenze criminale, partecipeghja à l’accolte chì di-nùnzianu u crìmine urganizatu. Dinunzia e pulìtiche ripressive di u Statu chì sprèzzanu i diritti di l’omu cum’ella a face contr’à l’arrestazioni arbitrarie o torna pè u scàndalu di l’assassìniu d’Yvan Colonna in prigione. Dinunzia dinù l’arcaìsimi, spessu a froda eletturale è rivendicheghja una sucietà demucràtica, appaciata, ghjusta, sulidària. Ben intesa lotta contr’à u razzìsimu è a zenufubìa, è dinunzia i discorsi d’odiu è di ri-ghjettu di l’altru, particularmente contru à i migranti. Intervene ancu à l’internaziunale è s’impegna per una pace ghjusta in Palestina. Hè attiva contr’à tutti i razzìsimi, vale à dì ch’ella dinunzia torna di manera regulare i discorsi d’odiu contru à i Corsi, spessu in a stampa francese.
A LDH partecipeghja à e riflessioni è i dibàttiti di a sucietà corsa. S’hè impegnata in a riflessione pè u Padduc eri, o contr’à a màffia oghje. Hè una cuscenza murale in Corsica chì ghjè impurtante. Ugnunu vede i so interessi primi, face chì i so cumunicati è e so intervenzioni ponu dispiace à le volte, ma a LDH Corsica intervene in fatti contr’à tutte l’offese contr’à a demucrazìa è pè u rispettu di l’Umanu. S’imprimurisce è s’impegna per l’avvene di a sucietà corsa, cum’ella l’hà fatta pocu fà cù a publicazione di u so Manifestu Per una Corsica di a Fraternità. Un documentu publicatu sanu sanu nant’à Arritti a settimana scorsa, chì chjama à una Corsica di l’uspitalità, l’aiutu, l’agora, u cumunu, u bislinguìsimu, a diversità, l’universalità, è chì scumbatte contru à a lege di u più forte.
A lega in Corsica hè presidatu da André Paccou, è parechje persunalità di u mondu pulìticu, culturale, universitariu, di l’Ìsula ne sò membri attivi.
À l’ora di a debbulezza di a sucietà civile cum’ella s’hè cunnisciuta in bullore in tempu di u riacquistu, è in ssi tempi duri oghje di ripressioni è di distabilisazioni, a Lega di i Diritti di l’Omu hè un associu impurtantìssimu per fà campà u dibàttitu demucràticu in Corsica. •