Natu in 2007, u cullettivu Parlemu Corsu cuntribuisce à una vera dinàmica chì dà forza è fiatu à l’avvene di a nostra lingua ! « Vulemu cuntribuì à l’ilaburazioni prugrissiva, in Còrsica, d’una sucità bislìngua, corsu/francesu » dice u so presidente Micheli Leccia.
Parlemu Corsu adunisce parechji associ è conta nant’à a forza è e cumpetenze di tutti, à l’imàgine di u so logò : un àrburu chì spane e so rame è e so ràdiche ! « Sò più di 800 i membra di Parlemu Corsu, 618 parsoni, 115 associa è 112 gruppa culturali o artisti… Nantu à u tarrenu, circhemu à muscià l’asempiu è a inghjinnà iniziativi in tutta a sucità. Dumandemu i meza ghjurìdichi, umani è finanziarii par pudè appiigà u nosciu pianu pà a lingua è i so 16 pruposti, par purtà una rividincazioni di moda uriginali, fistivi è culurita… Travaddemu cù i riprisintanti di l’altri lingui minuritarii par arrichì a noscia dimarchja è acquistà di più pesu è ancu una diminsioni intirnaziunali. »
Frà e misure di u so pianu pè a lingua ci hè l’ufficialità, l’immersioni per l’insignamentu, da e scole materne à l’Università, a creazione d’un polu di furmatori, « una furmazioni cunsiquenti ubligatoria par tutti i parsunali »di l’imprese, « una furmazione pà l’aienti senza travaddu, à a ritirata è à i corsi di fora », una radiò è una TV « in lingua corsa », a traduzione di « l’òpari litararii famosi », ma dinù di a tupunimìa, i còdici di a strada, i carti IGN, u cadastru, a signalètica cumunale o « in u mondu icunòmiccu », a creazione d’un uffiziu di a lingua corsa.
A so azzione a più famosa hè a Currilingua. « Hè una corsa à prò di a lingua corsa, fatta par accodda solda cù l’ugittivu di finanzà prugetta maiori à favori di l’usu di u corsu. »
Face quatru anni chì a Currilingua adunisce associi, imprese, sindicati, club spurtivi, scole, eletti, citatini… Ugnunu si compra unu o parechji chilòmetri è si trasmette un testimone franchendu tutte e pieve di l’ìsula. Ghjunti à a fine di a corsa, l’annu chì vene, si ripiglia l’itineràriu induve omu l’hà lasciatu l’annu scorsu. « Ùn si corri micca par vincia, hè una corsa chì si voli fistiva, chì voli impignà u più pussìbuli d’aienti è chjamata à crescia d’un annu à l’altru ! » A simbòlica pè a lingua hè magnìfica : « ùn irrumpìmu micca a catena ! » Hè un invitu à tutta a sucietà !
Parlemu Corsu rifletta à parechji prugetti : Chì si face un appiecazione per telefuninu da pudè accede in un cliccu à tutte l’infurmazioni cuncernendu a lingua, Pulinumìa un librettu spiechendu ciò ch’ella hè a lingua corsa, Rubbutiscola un attellu di rubbòtica in lingua corsa per aiutà l’insignamentu in immirsione, Furmànimauna furmazione per l’animatori chjamati à sprìmesi in lingua corsa…
Parlemu Corsu partecipeghja dinù à tutti i dibàttiti, e manifestazioni è l’azzioni à favore di a nostra lingua. U so sèriu, a so apertura, a so tecnicità à prò di a lingua corsa, li danu una legittimità chì ne face un riferente forte è indispensèvule per sparghje una pulìtica di riacquistu di a lingua corsa. Felicitazioni è ventu in puppa ! •
Infurmazione è cunttati : https://parlemucorsu.corsica