Spessu hè imbullighjatu cù i partiti di i militenti ch’ellu difenda, vistu u mischiu di i purtavoci, ma Sulidarità hè un associu à parte sana, chì scumbatte pè a difesa di i prigiuneri pulìtichi corsi. Dumanda a liberazione di tutti i prigiuneri è a fine di tutte e persecuzioni.
L’associu porghje sustegnu à i prigiuneri è à e so famiglie per rompe a sulitùtine ch’ellu cerca à impone u sistema ghjudiziariu francese. A prigione costa caru. Costa annate di vita persa, costa a spicanza cù i soi, costa l’amende ch’accumpàgnanu a cundanna à a prigiò, è chì pèsanu cum’è una doppia pena, ma costa dinù in u cutidianu carcerale di a ghjente chjosa. Tuttu si paca in prigiò, e sigarette, u sapone è altri prudutti sanitarii, a roba da manghjà per migliurà u cutidianu, eccèttera. L’associu prova à mandà 200 € à u mese à ogni prigiuneru ch’ellu accumpagna è 6 000 € per ogni cartulare di difesa.
Hè presente in e fiere o serate di certi gruppi culturali. Cù vèndita di magliette è altri prudutti, cù i doni di i militenti, prova cusì à truvà i mezi per sustene i patriotti incarcerati.
Durante à a ghjurnata annuale internaziunale di i prigiuneri pulìtichi, Sulidarità urganizeghja cù l’aiutu di cantarini corsi, una serata di sustegnu à a càusa ch’ellu difende. Sta ghjurnata hè dinù l’uccasione d’infurmà, cù distribuzione di stampini in carrughju, nant’à a situazione di i prigiuneri è l’inghjustizie da scumbatte. Hè presente dinù in i dbàttiti è e manifestazioni. Urganizeghja ellu stessu manifestazioni contr’à a ripressione è pè i diritti di u pòpulu corsu, cum’è u 2 marzu scorsu in Bastia, urganizata cù l’altru associu di difesa di i prigiuneri, u cullettivu Patriotti.
Ancu sè a situazione pare migliurassi cù u ritornu in Corsica di certi imprigiunati è e discussioni di Beauvau, in fatti, a ripressione hè sempre pèssima è s’hè ancu ingattivita di misure di pressione insuppurtèvule, cume a scrizzione automàtica à uni pochi di schedarii inghjusti è cuntrarii à e cunvenzioni internaziunale di i diritti di l’Omu. U Fijait per un dettu (schedariu naziunale di l’autori di malfatti terruristi), custringhje ancu sè vo site liberatu, di fà sapè a vostra situazione persunale tutti i trè mesi durante 10 anni. S’omu si ne scorda pò esse torna cundannatu, sint’à dui anni di prigiò è 30.000 € d’amenda. L’infurmazioni persunale sò cusì tenute durante omancu 20 anni. L’anziani prigiuneri è i so avucati dinùnzianu ssu schedariu chì cuncerna u terrurìsimu islamistu stimendu ch’elli ùn anu nunda à chì vede i prigiuneri pulìtichi corsi.
Quist’annu, a serata di i prigiuneri si tene u 13 d’aprile in Bastia, à a sala pulivalente di Lupinu, cù Felì, Stèfanu Travaglini è l’Arcusgi. Da truvacci à pàrtesi di 7 ore di sera. •
Cuntattu : www.associu-sulidarita.org
Facebook : Associu Sulidarità
Twitter (X) : AssoSulidarita