L’associ fàcenu cresce e nostre lotte. Arritti hà apertu quì una nova rubrica per salutà u so impegnu è prisentali à i so lettori. Sta settimana, parlemu di U Levante.
U Levante hè un associu di prutezzione di l’ambiente natu in u 1986 per impedisce l’urbanisazione di u situ di a Restònica. S’hè fattu cunnosce dinù luttendu contr’à l’incineratore ch’impuzzicava Corti. Po hè statu assai attivu per impedisce u smantellimentu di a lege liturale in u 1997, creendu cù d’altri associ di difesa di l’ambiente, u Cullettivu pè a lege Liturale.
Hà partecipatu dinù à d’altre lotte, cum’è quella di u Fronte anti-Padduc per ricusà u prugettu destruttore di a Diritta in 2004, tandu à e cummande di l’Assemblea di Corsica è chì vulìa strughje e lege di prutezzione di i spazii rimarchèvuli. Una volta avè impedita sta catastrofa, hà partecipatu à e discussioni pè a realisazione di l’attuale Padduc adupratu in 2015. S’hè impegnatu dinù à u senu di a cuurdinazione di lotta contr’à l’incineratore, o, più vicinu, contr’à u prugettu di centru di sutteramente di i lozzi nant’à e ribbe di u Tavignanu, o torna, a cuurdinazione Corsica Pulita per un trattamentu più pulitu di i nostri lozzi.
U Levante hè ricunnisciutu pè e so cumpetenze in materia di drittu di prutezzione di l’ambiente. I so soci s’impègnanu cù disinteressu per fà ricunnosce l’impurtanza di a natura ind’è e nostre vite è pè u nostru sviluppu.
I so scopi sò : prutege i spazii, e risorse, l’abitati naturali, e spèzie animale è vegetale, a diversità è l’equilìbrii eculògichi fundimentali, l’acqua, l’aria, a terra, i paisagi. Lotta contr’à tutte e pulluzioni è pè u rispettu di a legalità da e persone pùbliche è private. S’impegna dinù per migliurà e lege, i regulamenti è i Trattati chì prutègenu l’ambiente, spessu u liturale. Prumove l’energìe rinuvelèvule ammaestrènduli, a valurisazione di i lozzi cù a scelta selettiva è u ricìculu, da migliurà u nostru quadru di vita è da fà sparisce e rumènzule for’di lege. Prumove un accunciamentu di u territoriu armuniosu trà u liturale è l’interiore di l’ìsula, è a maestrìa d’un urbanìsimu rispettosu di a natura, è chì si risparmia a terra. Lotta dinù contr’à a divagazione animale.
U Levante ùn face micca pulitichella. A so sola pulìtica hè a difesa di a natura. Ùn tocca nisun suvvenzione. Si finanza cù u solu aiutu militente. Hè sociu di France Nature Environnement, è partecipeghja à e riunioni di sfarente strutture regiunale, cum’è u Cunsigliu di i Siti, a Cumissione territuriale di a preservazione di i spazii naturali, agrìculi è furesteri (CTPENAF), u Cunsigliu Ecunòmicu, Suciale, Ambientale è Culturale di Corsica (CESEC), o l’attelli di l’Assemblea di Corsica per luttà contr’à a màffia.
U Levante sò una millaia d’aderenti, dui avucati acuti, una rivista d’infurmazione Ambiante è una newsletter. I so militenti sò benevulenti è pàcanu di u so tempu, à le volte di i so soldi. U so impegnu, u pàcanu bellu spessu dinù d’insulte, minaccie, attentati…
Merìtanu a nostra cunsiderazione è u nostru sustegnu di pettu à tutti i curnachjoni. •
Infurmazioni è cuntatti : www.ulevante.fr