40 anni di Corsica Sera dinù !

U novu passu di a televisione corsa

U primu nutiziale u 16 di dicembre di u 1982, cù i so pilastri Sampieru Sanguinetti è Ghjuvan’Marcu Leccia, disgraziatamente sparitu.
Sti belli tempi di u Riacquistu, ci tocca à ammentà à e nove generazioni ciò ch’elli sò stati di cumbugliu, di voglia, di vuluntà, di leva. È à ssa bella ghjuventù, li tocca à circà à scopre a nostra stòria per capisce d’induve ella vene, ciò ch’ella deve à u dinamìsimu, e brame, a determinazione di sse generazioni nanzu à ella ch’anu rinvivitu a speranza d’un pòpulu. O zitè, sàppiate chì u Riacquistu hè statu una mansa d’iniziative in un allegrìa è una speranza scema, nant’à tutti i duminii di l’identità ritruvata. Di colpu, u Corsu amparava ch’ellu avìa a so particularità è spessu ch’ella li permettìa di campà in terra soia, è di mette in valore tuttu ciò chì face ch’ellu hè una cumunità particulare in u cuncertu di e nazioni di u mondu. Cum’elli èranu belli ssi tempi induve si scuprìa ciò chè no èramu cullettivamente, e capacità di u nostru pòpulu, e richezze di ssa terra, a libertà chè no pudìamu prendre, per affirmassi sempliciamente Corsi. È tandu, u gèniu umanu s’hè svegliatu è hà cumpostu in un sbuccime di edee nove è di vuluntà d’esse. Artisgianatu, agricultura, cultura, ecunumìa è perchè micca noi ?, si dicìanu i Corsi tandu ! In ssu fracassu strasurdinariu, sò nate mondu belle stituzioni, urganìsimi, associi, sindicati, imprese, frà i quali, a televisione corsa !

 

 

Ci ne vulìa tandu vuluntà, per ghjunghje à ssa custruzzione d’una televisione pròpia à u nostru territoriu ! Avìamu e capacità, avìamu e cumpetenze, bastava à piglianne cuscenza, avenne a vuluntà è strappanne i mezi ! Cusì fù fattu pè a stazzione regiunale di France 3 Corsica, à l’èpica, cum’è in parechji altri duminii induve u nostru sapè fà ùn aspettava ch’à mèttesi in ballu ! Ùn era tandu chì una dizzinghera di France 3 naziunale, cù i so urarii è i so mèttodi imposti… ma ci vole à dì quantunque ch’ella era u mumentu in Francia cù a multiplicazione di l’antenne regiunale. Sott’à a vuluntà di ghjente cum’è Sampieru Sanguinetti, Ghjuvan’Marcu Leccia è parechji altri à u so latu chì mi scuseranu d’ùn esse citati, tutti st’innamurati di l’audiovisiu chì vulìanu mèttelu à u serviziu di a Corsica, sò ghjunti à creà u so pròpiu arnese d’infurmazione. È cusì, u primu « Corsica Sera » hè diffusatu u 16 di dicembre di u 1982, 40 anni fà ! Sampieru Sanguinetti tandu n’hè incaricatu, impieca una sessantina di personi, ghjurnalisti, tècnichi, amministrativi, sparsi trà Aiacciu è Bastia, puru tucchendu tutti i rughjoni. S’impiècanu à custruisce un ghjurnale tutte e sere di vinti minuti. S’accumpagna in fùria d’un magazinu d’un quartu d’ora trè volta à a settimana. È u ghjurnale hà da evuluà torna. È cù ellu a televisione regiunale chì si runzicherà pocu à pocu l’ore d’antenna è a pussibilità di strutturassi sempre di più, à creà magazini, à pone dibàttiti. Ma ùn ci vole micca à pensà ch’elle sò state fàciule st’evuluzioni. Ci hè vulsutu à bàttesi è à strappà cù lotte è manifestazioni ogni avvanzata. Ancu oghje, una vera televisione sana sana corsa è lìbera ferma à impone. Ma u cambiamentu hè statu tremendu.

 

In gràzia à France 3 Corsica è u so ghjurnale Corsica Sera, cù l’appoghju in fùria di a ràdiu di u serviziu pùblicu, è ben intesa di tutti i mèdia assuciativi o privati, cum’è Arritti, Kyrn, RCI, eccèttera, nati dapoi l’anni 60, è quelli creati dopu cum’è Alta Frequenza, RCF, Corse Net Infos eccèttera, l’infurmazione ùn era più « ràdiu prefettura » cum’elli s’addisperàvanu tandu i Corsi. Di colpu, in ssu 1982, nasce una televisione pè i Corsi, fatta da Corsi, per fà cunnosce i fatti è l’attualità in Corsica ! Bellu più, s’agisce di custruisce un mèdia lìberu. Fallu sorte di e custrinte di a parulla data solu sin’à avà à u prefettu è à i sgiò di u clanìsimu, per àpresi à tutte l’attualità, stende u micrò à ghjente ch’omu ùn vidìa mai à a televisiò, l’uppusizione, è pè u più, i naziunalisti ! Si leva u velu nant’à certe verità, certi fatti sin’à oghje affucati, sò cummentati, ublichendu dinù a stampa scritta, i cutidiani è l’altri media à addattassi à sta manera nova di rende l’infurmazione. Fà sente dinù nant’à u scrinu è nant’à l’onde a lingua, i canti è a mùsica corsa ! Sparghje u travagliu fattu da l’agricultori, l’artisgiani, e fiere, i festivali… Tuttu què ci pare nurmale oghje, ma sàppiate ch’ella era una rivuluzione tandu ! À tempu, si prova à custruisce un arnese mudernu, prufessiunale. In u 1982, a nàscita di u ghjurnale televisiu hè statu un mumentu determinante di a presa di cuscenza in Corsica, di e nostre singularità, di e nostre capacità, di e nostre cumpetenze, di a richezza di l’attualità è di u cumbuglilu di l’iniziative è l’azzioni cutidiane impiecate à custruisce l’avvene.

 

Bon’anniversariu à u « Corsica Sera », è à tutte e squadre di France 3 Via Stella ! Longa vita è prugressu à a nostra televisione da ch’ella possi diventà sempre più ssu strumentu ch’hè statu sunniatu 40 anni fà ! •

Fabiana Giovannini.