150.000 personi in Francia, frà e quale quasi a metà in Parigi, centinaie di millaie in u mondu, è pò dassi di più, anu sfilatu u 7 di sittembre scorsu à u succorsu di a pianetta. L’iniziativa in Francia hè ghjunta da e rete suciale dopu à a demissione di u ministru di l’ambiente, Nicolas Hulot. Hè un ghjuvanottu di 27 anni, Maxime Lelong, ch’hà lampatu ssa chjama ch’hà raccoltu in pochi ghjorni 85.000 risposte… Mondu associi l’anu appughjata…
In u mondu dinù hà marchjatu a ghjente per dumandà vere misure per luttà contr’à u riscaldimentu climàticu, a pèrdita di a biodiversità, è tutti i sregulamenti chì mèttenu in perìculu l’avvene. In San Francisco, più di 30.000 personi anu manifestatu à l’uccasione di una cunferenza internaziunale nant’à u clima. Hè a prima volta in Californìa chì una manifestazione per l’ambiente adunisce cusì mondu. Timpeste, sicchine, crèscita di u livellu di u mare… a Californìa cunnosce evenimenti stremi dapoi parechji anni. Cresce l’inchietùdine. Da u 12 à u 14 di sittembre s’adunìscenu in San Francisco 4000 dirigenti, militenti, circatori è persunalità per dibatte nant’à e cunsequenze di u riscaldimentu climaticu. A cità hè stata scelta per vìa di a vuluntà di Donald Trump di rilancià e splutazioni petruliere à u largu di a Californìa. À u Brasiliu, u Nigeria, in Turchìa, in Ìndia, in China, in Australìa, in Àfrica, da Brussella sin’à in Bangkok, Manille, Copenhague, Lisbonne, Stockolm, Abuja, Accra, Narino, Sydney cum’è in Parigi, parechji sò torna à avè manifestatu anch’elli per pisà nant’à e decisioni di quelli ch’impuzichìscenu a pianetta. Serà u svegliu salutariu tant’aspettatu?
S’appronta a COP24, vale à dì a 24a cunferenza internaziunale contr’à u riscaldimentu climaticu dapoi u famosu protocole di Kyoto. Più d’una millaia d’azzioni èranu urganizate in una centinaia di paesi nant’à u tema in inglese «Rise for climate » (arritti pè u clima). « L’evenimenti climatichi stremi minàccianu i nostri figlioli. A sola manera di prutege u nostru avvene, hè una azzione ambiziosa pè u clima, sùbitu avà » hà dettu u secretariu di e Nazioni Unite, Antonio Guterres. Ssa mossa citatina vene in confortu dinù à una chjama lanciata da 700 scientìfichi francesi nant’à u ghjurnale Libération per dumandà à u guvernu di passà « da l’incantazione à l’atti incaminèndusi ver di una sucieta senza carbone ». In u mondu, n’avemu parlatu a simana scorsa, sò più di 23.000 scientìfichi di 184 paesi ch’anu zifratu di nuvembre 2017 una chjama à u succorsu di a terra nant’à a rivista BioScience. 97 % di i scientìfichi chì travàglianu nant’à e càuse di u fenòmenu climàticu a dìcenu : hè per vìa di l’attività umane ch’ella si ricalda a timpertura di a pianetta. Sviglièmuci.
Fabiana Giovannini.
