Eh dì chì certi media avìanu dettu chì i Talibani avìanu cambiatu… Trè mesi dopu à èssesi impatruniti di Kaboul, a so rispettabilità ùn hè digià più quella ! Hè statu rimessu in marchja u ministeru di a prumuzione di a virtù è di a prevenzione di u viziu ch’era statu creatu à a so presa di putere in u 1996. A ghjente u temìanu assai per vìa di e punizioni è i castichi ch’ellu sciaccava à chì ne vole ! Avìa interdettu a televisione, u sinemà, è tutti i divertimenti. Avè una ràdiu o un magnetoscopu custava flagellazioni pùbliche. L’omi èranu ublicati di purtà a barba è interdetti di fumà, e donne duvìanu esse cuperte da cim’à in fondu, s’ellu si vidìa un pezzucciu di pella, èranu flagellate, à le volte ancu peghju. U fundamentalìsimu era scatinatu. Quand’elli sò stati scacciati di u putere in u 2001, u paese s’hè tramutatu. À longu à i 20 anni scorsi u settore audiovisiu hè sbucciatu, si sò creati decine di stazzioni di ràdio è catene televisìe private, e donne d’un colpu liberate anu vintu u drittu à travaglià, à sorte sola, à studià. Cù u ritornu di i Talibani, a paura hè vultata. Oghje torna, e donne ùn anu u drittu à travaglià in i servizii pùblichi nè à andà in i cullegi, i licei, o l’università. In certi lochi, a scola si pianta à sette anni. In d’altri lochi, hè sempre chjosa. « I talibani ùn lascieranu micca e zitelle studià in scola. Quand’elli pìglianu u cuntrollu d’un distrittu, a prima cosa ch’elli fàcenu hè di chjòdeli e scole » avìa testimugnatu d’aostu scorsu Shahla, insignante à l’Università di Kaboul. « Certe infurmazioni ci dìcenu chì e donne ùn anu drittu à sorte senza a cumpagnìa d’un omu. Ci sò stati matrimonii furzati trà suldati è ghjuvanotte » alarmava torna Khadjija, un circatrice di l’Afghan Analyst Network. Oghje u paese ecunumicamente hè affundatu. E famiglie ùn anu più nunda per campà. I babbi vèndenu e so zitelle à i talibani da pudè fà manghjà u restu di a famiglia. Zitelluccie di 8, 10 o 12 anni sò cusì maritate… L’affissi induv’ellu si vidìanu donne, sò state ripinte o strappate. U 21 di nuvembre scorsu u ministeru di a prevenzione di u viziu hà fattu sapè chì e donne ghjurnaliste ùn duvìanu più mustrassi senza u velu islàmicu. E televisioni ùn dèvenu più mustrà filmi, documentarii o serìe induv’elle ghjòcanu e donne. Più prestu chè previstu dunque, si rivene à una sucietà induv’elle sò rese invisìbile è disprezzate e donne, è a burqa si generalizeghja… Ùn sò permesse l’emissioni upposte à i valori di l’Islamu o chì mòstranu u prufeta è i so cumpagni. A mùsica hè interdetta, mondu più in pùblicu. E donne ghjùdice o avucate anu a paura. « Avemu ghjudicati è cundannati ss’omi. S’anu da vulè vendicà » dicìa una ghjùdice d’aostu scorsu. Dapertuttu induve a donna occupeghja una piazza impurtante, ind’è a ghjustizia, l’insignamentu, i mèdia, a pulizza, a salute… tèmenu pè a so vita. Quattru donne sò state tumbate u 6 di nuvembre in u nordu di u paese, frà e quale una militente feminista. Circàvanu à fughje l’Afghanistanu. Certe donne curagiose anu pruvatu à manifestà, i ghjurnalisti sò stati minacciati da ch’elli ùn pàrlinu micca di sse tentative di rivolta. L’uccidente ùn dice nunda per vìa chì i talibani sò in guerra contr’à u Statu Islàmicu (EI). Corciu pòpulu afganu inchjuvatu trà sse duie malamorte ! È forza à sse donne cundannate à l’oscurantìsimu. •
