U cullettivu Tavignanu Vivu hè statu creatu in u 2016 per luttà contr’à un Centru di sutterramentu di lozzi in Ghjuncaghju, nant’à e sponde di u Tavignanu. Stu prugettu scemu, purtatu da a sucietà Oriente Environnement, vole ammansà ogni annu durante 30 anni, 70.000 tunnellate di lozzi, vale à dì 2,1 millioni di tunnellate. Dinù 102.000 tunnellate di terre tigliose, vale à dì 3,06 millioni in 30 anni. Tuttu què nant’à un situ geològicu scaghjolu, nant’à e ripe di u secondu fiume di Corsica ! U locu hè classificatu cum’è Spaziu Stratègicu Agrìculu è zona Natura 2000. U prugettu hè dinù periculosu per vìa chì si racoglie quì l’acqua putàbile è l’acqua agrìcula di tutta a regione in
ghjò chì conta numerose Indicazioni Geugràfiche Prutette è Appellazioni d’Orìgine Prutette.
U cullettivu Tavignanu Vivu dinunzia dunque un rìsicu di pulluzione irreversìbile di l’acqua di tuttu u territoriu, una minaccia pè a salute di a ghjente, di l’animali, di a vegetazione, di u mare.
In quantu à u tigliu, u cullettivu dinunzia dinù u rìsicu di cuntaminazione da a pòlvera di u tigliu traspurtatu.
Face più di sett’anni avà ch’ellu scumbatte in tribunale u cullettivu, cù l’aiutu dinù d’altri associ cum’è U Levante, Umani, Terre de Liens, Notre Affaire à Tous… Hè sustenutu dinù da a Cullettività di Corsica, parechje cumune di l’ìsula è da i partiti naziunalisti.
U cullettivu vole fà valè i diritti di u fiume. Una dichjarazione di i diritti di u Tavignanu hè stata aduprata u 29 di lugliu 2021. Si scrive in u muvimentu internaziunale di ricunniscenza di i diritti di a natura chì brama d’ottene una persunalità ghjurìdica per l’elementi naturali cum’è e fureste, i fiumi è l’altri ecosistemi, da ch’elli sìanu difesi è prutetti.
Rivendicheghja diritti fundimentali cum’è u dirittu à esiste, campà è corre, u dirittu à u rispettu di i so cìculi naturali, u dirittu à empie e so funzioni eculògiche essenziale, u dirittu à ùn esse pulluatu, u dirittu à nutrisce è esse nutritu da e stese acquale di manera durèvule, u dirittu à u mantenimentu di a so biodiversità pròpia, u dirittu à a regenerazione è à a risturazione, u dirittu à difèndesi in ghjustizia…
U cullettivu hà dinù purtatu a rivendicazione di pettu à a Cumissione è u Parlamentu aurupeu. Una petizione hè in traccia d’esse esaminata da a Cumissione di e petizioni.
Tavignanu Vivu lotta dinù per prutege, cunservà è risturà i spazii, risorze è abitati naturali, sensibilizà à u rispettu di l’ambiente, luttà contr’à e polluzioni di tutte e mamme è per difende l’interessu è a salute di a populazione in tutta a piana di u Tavignanu è in piaghja orientale.
I so soci sò tutti benevulenti. U finanziamentu di l’associu si face cù i doni di a ghjente è e ricette di e so azzioni (serate, cuncerti, vèndite vàrie…). •
Sustenìtelu, ziffratte a dichjarazione di i diritti di u Tavignanu : www.tavignanu.corsica
