U 5 di maghju 1992, à 8 ore 23 di sera, si sfonda in Furiani in un fracassu di ferame è mughji umani, a tribuna cullata apposta in fùria in fùria pè a meza finale di a coppa di Francia di ghjocu à pallò chì duvìa oppone u Sporting Club di Bastia contr’à l’OM.
Dopu à a qualificazione di u Sporting in quartu di finale contr’à Nancy, i dirigenti bastiacci decìdenu di strughje a vechja tribuna nordu di 750 piazze per custruisce una tribuna mettàllica di quasi 10.000 piazze… U prublema hè chì u tempu hè cortu per rializà u travagliu da u 24 d’aprile à u scontru previstu u 5 di maghju… Ùn ci serà micca autorisazione di destruzzione è i materiali di a nova tribuna ùn seranu micca cunformi. Eppuru, in u periodu a cummissione di securità s’adunisce parechje volta per dà u so accunsentu malgratu mondu riserve. L’ùltima riunione ùn si tene micca per vìa di l’assenza di u prefettu… Nimu ùn vole piglià a respunsabilità di dì chì ssu scontru ùn hè pussìbule… U macciu si tene di manera illegale.
U club ellu cerca à richjappà e so spese. I biglietti sò venduti belli più cari chè quelli di u quartu di finale. Puru, mancheranu soldi à l’ora di fà i conti, ma u presidente di u Sporting ùn puderà mai spiecassi. Jean-François Filippi hè assassinatu u 26 di dicembre 1994.
A catastrofa hà fattu 19 morti è 2357 feriti, frà certi marcati pè a vita. U traumatìsimu hè tremendu per tutta a Corsica. A cuppa 92 ùn serà mai attribuita.
Nasce un cullettivu di difesa di e vìttime per chede ghjustizia è fà ricunnosce u dulore di e famiglie. Ma a parte ghjudiziaria di a catastrofa ùn lascia chè amarezza è disgustu. Trà Lega, spendifochi, cummissione di securità è Sporting, 18 personi sò messe in esàmine, 13 sò mandate in Tribunale, ma e cundanne ùn sò micca à u livellu di u drama.
In 2010, sò i zitelli di e vìttime chì ripìglianu u fiatu per dumandà a ricunniscenza pulìtica di ssu drama, da ch’ellu ùn accade « mai più ». Petizioni, manifestazioni, riunioni, sulidarità cù altri cullettivi di vìttime di catastrofe spurtive, azzioni da tutte e mamme fàcenu rimuschju in tutta l’Auropa. Infine, 20 anni dopu, si còntanu l’avvanzate. In 2012 a finale di a Coppa di Francia prevista un 5 di maghju hè ripurtata, dinù i scontri di u campiunatu di Francia. In 2015, a Lega s’ingaggia à ùn più urganizà scontri di ghjocu à pallò prufessiunale un 5 di maghju. In 2018, a misura hè effettiva. U 13 di ferraghju 2020, l’Assemblea naziunale adopra u prugettu di Lege di u deputatu Michele Castellani chì sacralizeghja infine u 5 di maghju ! In u frà tempu, sò urganizate minuti di silenziu, infurmazioni à e giòvane generazioni è umagi vàrii…
Oghje, u cullettivu hà per scopu l’urganisazione d’evenimenti è di manifestazione da perpetuà a memoria di e vìttime. Hè ciò ch’ellu face, ogni annu, da ùn scurdassi mai di ssa catastrofa a più tremenda di u sport in Francia. Hè un travagliu suciale è nant’à a memoria cullettiva impurtantìssimu. A ferita ferma sempre aperta. •
