U 29 di marzu scorzu, cù a so vittoria 3 à 1 contr’à Borgu, u GFCA hà ritruvatu u livellu di a Naziunale di u ghjocu à pallò, cù u tìtulu di campeone di Regiunale 1 in più !
Mezavìa era in festa per salutà sta rinàscita di a squadra rossa è turchina. Una prudezza quand’omu pensa à a fallata in infernu dui anni fà. Dui anni dopu è cù duie cullate successive, u Gaz ritrova dunque un livellu più in raportu cù u so passatu gloriosu è u so palmarès.
Ponu fallà e saette, a passione, u travagliu è a vuluntà mòstranu e capacità di resistenza di ssu club ch’hà scrittu una parte di a stòria di u ghjocu à pallò corsu.
Hà dettu u so presidente, Luigi Poggi, anzianu ghjucatore di u Gaz, « vogliu sciaccamanà i mo ghjucatori chì merìtanu ssu tìtulu è sta cullata. Oghje, scrivimu un antru bellu mumentu di a nostra stòria è face veramente piacè, sopratuttu quand’omu sà induve ci hè vulsutu passà per ritruvà a lumera. »
Tante felicitazioni à i ghjucatori è i dirigenti ! Ventu in puppa pè a pròssima stagione ! •
