Stituzioni, terra, trasporti, agricultura, turìsimu, acqua, salute, precarità, imprese, fiscalità… sò numarosi l’inghjochi di a rinàscita ecunòmica è suciale di a Corsica. Eppuru, ancu s’ella ùn hè capita cusì dopu à più d’un mezu sèculu di rivendicazioni, a lingua hè u fundimentu di tuttu. Senza lingua, ùn ci hè nè corpu nè ànima, ancu di menu pulìtica ingènia. Surgente è spechju di a nostra identità, a lingua hè a cuscenza è u genomu di u nostru pòpulu. Cosa fermerà nant’à sta terra sè no perdimu a nostra lingua ? Cosa fermerà di noi altri, di ciò ch’elli ci anu purtatu l’antenati, di u leame trà generazioni, di a forza è a dinàmica di a nostra cultura, di a voglia di tramandala, di u pòpulu stessu ? « Ùn ci hè lingua senza cultura, è ùn ci hè cultura senza lingua. Sè vo perdite a lingua, perdite tuttu. » rispundìa Felip Hammel à Arritti a settimana scorsa. Hè un di i funditori di e scole assuciative immersive in lingua occitane ch’hà scumbattutu tutta a so vita di parente, d’insignante, di militente à a rinàscita di a so lingua, per l’avvene di l’identità di u so paese : i zitelli ! Tuccà i zitelli, furmà a giuventù, dalli una cuscenza, hè a chjave di a rièscita d’un paese. E scole sò arnesi magnìfichi per custruisce sta cuscenza di e donne è di l’omi di dumane. Arnesi chì tramàndanu l’èssere cullettivu, u sensu di e cose, a vuluntà di spàrghjele. Da ch’elle rispòndinu à a so missione, bisogna à tempu à l’insignamentu è l’accumpagnamentu di i zitelli, appruntà i maestri di dumane, da ch’elli stessi sìanu furmati in cuscenza per sta missione magnìfica di a presa in càrica di a vita di ssi zitelli, è cù elli, a rinàscita d’un pòpulu. Felip Hammel hà fundatu Aprene, l’istitutu di furmazione di i maestri di e Calendreta in u 1995, furmendu quasi 300 insignanti cumpetenti da dinamizà sse scole. Ùn basta micca. Ma ghjè un puntellu per empie sta missione essenziale. Cù elli, piglierà sumente a voglia di tramandà a lingua è da sse chjome bionde nasceranu mondu insignanti da spàrghjesi ind’è sse scole per suminà anch’elli… In Francia sò parechje lingue ch’ùn vòlenu sparisce è chì anu presu listessa strada inditata da i Baschi, cù Seaska, a federazione di e scole assuciative immersive in lingua basca. Baschi, Brittoni (Diwan), Catalani (Bressola), Alsaziani (ABCM-Zweisprachigkeit), Occitani (Calendreta) è dapoi quasi cinque anni Corsi dinù in grazia à Scola Corsa, spàrghjenu a so lingua in sse scole. Ma micca solatimente a lingua. Spàrghjenu una manera d’esse è di vulè esse cullettivamente. Spàrghjenu a cultura, a stòria, a geugrafìa, di i so paesi rispettivi. Lighjite puru st’artìculu di Felip Hammel* sè vo ùn l’avete ancu fatta. Riassume a manera d’insignà di e scole Calendreta inditendu à tempu una manera d’esse da furmà i maiò di dumane. Una lingua, hè una manera ùnica di vede a vita è a sucetà. Hè richezza per l’Umanità. Quand’omu tramanda una lingua, tramanda un tesoru pè u zitellu chì a riceve. Individuale è cullettivu. Li dà una famiglia. Pò aldilà di u sensu stessu d’appartenenza à una cumunità, a lingua hè dinù un tesoru pè u sviluppu è l’ecunumìa. Micca solu cù i mistieri chì li sò leati, di l’educazioni, l’animazioni, a cultura… ma dinù per tutte l’imprese, in grazia à a forza, a dinàmica è a voglia ch’ella face nasce. U fundimentu di tuttu. O ghjente, parlate, lighjite, scrivite, sparghjite a lingua corsa. •
Fabiana Giovannini.
