U Svegliu Calvese hè statu creatu da Blaise Orsini di lugliu 1981. Omu di cultura, s’hè spentu in u 2019 à l’età di 83 anni. Ci ferma a so òpera è a fede ch’ellu hà trasmessu à mondu artisti è militenti culturali balanini ch’anu presu a so sèguita.
L’associu hà per scopu di porghje a so parte à u sviluppu culturale, i scàmbii trà regioni, a rinàscita di l’usi è e tradizioni, da stringhje e lee suciale, sveglià e cuscenze è fà cresce l’ànima corsa in u core di i Corsi. Porta bè u so nome, svegliendu a cità balanina dapoi 40 anni !
Cusì, u Svegliu hà sparsu evenimenti è scontri da tutte e mamme cum’è Citatella in Festa, Stonde nant’à u marcatu, A passione, À libru apertu, i Scontri di canti pulifònichi… è mondu attelli, cunferenze, mostre, creazioni musicale o teatrale, balli, residenze d’artisti… Partecipeghja à evenimenti nustrali, cum’è a Festa di a Lingua creata da a Cullettività di Corsica in u 2012, o e Ghjurnate aurupee di u Patrimoniu. S’impegna dinù per sparghje a cultura à i sculari è cullabureghja assai cù u gruppu
A Filetta cum’è pè a ripresentazione di A passione, rializatu da Orlando Forioso cù cunfratelli è attori. À tempu spetàculu teatrale è à tempu rituale di a passione di Cristu, A Passione hè cantata è ghjucata in i carrughji di Calvi cù assai emuzione sparsa à u pùblicu.
A Filetta hè dinù partenariu di u Svegliu pè i Scontri di canti pulifònichi.
Eccu ciò ch’ellu ricerca u Svegliu ! Sparte emuzione, passione, scambii, mischiu di a lingua è a cultura corsa cù altre lingue è culture, riflessioni, nant’à a cultura, a stòria, l’evuluzioni di a sucietà, a pulìtica, i sìntimi umani.
Hè un associu pupulare chì campa di u sustegnu di i so membri, micca solu balanini, è di l’aiutu di e cullettività ma dinù di cumercianti è imprese.
L’11 di sittembre scorsu, u Svegliu Calvese era torna in prima lìnea cù l’artisti è i militenti culturali balanini, à manifestà per l’inaugurazione di a nova sala di spetàculu di u rughjone Calvi-Balagna. L’ufficiali s’èranu scurdatu d’invitali à fà festa per ss’evenimentu ch’omu aspetta dapoi 20 anni ! « Eppuru simu quì » era scrittu nant’à a so banderole… Nè invitati à l’apertura, nè cunsultati per cuncepisce sta casa di cultura chì ghjè dinù soia… u sbagliu hè pocu capiscitoghju. « L’inaugurazione si face à tempu à l’apertura di i 36èsimi Scontri di canti pulifònichi di Calvi chì fàcenu vene ghjente di u mondu sanu. Ghjè incredìbile ! » si stumacava Ghjuvan’Claudiu Acquaviva di A Filetta.
« Simu nant’à u terrenu dapoi 40 anni. Bramemu di più ricunniscenza da a parte di l’ufficiali, per tuttu u travagliu fattu »s’hè inzerghitu u presidente di u Svegliu Francescu Canava. Bramemu ch’ellu ci serà di più sumerinu pè a splutazzione di ssu locu tantu aspettatu.
A cultura hè donu è una lotta permanente, per esse è per campà. U scopu hè di spàrghjela à u pùblicu u più largu pussìbule per trasfurmà a sucietà.
U pròssimu appuntamentu di u Svegliu hè u 25 d’ottobre per L’appuntamenti di u Tramontu, un dibàttitu cù Francescu Casabianca di u Cunsigliu ecunòmicu suciale ambientale è culturale di Corsica : « Manghjà nustrale versu l’autunumìa alimentaria di a Corsica » à a Poudrière in citatella di Calvi, 6 ore di sera. Ùn ci mancate ! •
Cuntattu
https://svegliu.com
04 95 65 23 57
[email protected]
