L’associ fanu cresce e nostre lotte, Arritti apre una nova rubrica da salutà u so impegnu ! Sta simana demu un ochjatella à Umani, associu per una Fundazione di Corsica.
Umani
Fundata da Ghjuvan’Francescu Bernardini, a Fundazione di Corsica Umani hè stata creata in u 2002 da priserve u patrimoniu culturale è umanu, dendu pettu à l’inghjochi maiò di a pianetta. U so impegnu u più cunnisciutu hè quellu di sparghje a nò viulenza cum’è arnese di pace è di suluzioni à i prublemi.
100.000 giòvani è personi maiò sò stati tocchi da l’arnesi è e strategìe di a nò viulenza ! Sò cusì millaie d’ore è di scàmbii intornu à e tècniche di a nò viulenza. Un travaglione tamantu da salutà !
« Ghjuntu sìmbulu di i nostri prugrammi è di e nostre azzioni, st’operata incarna, spira è rinforza ciò chì l’eculugìa, a Terra, e diversità, e sulidarità, i sapè aspèttanu di noi. Diventemu artigiani di a nòviulenza ! » dice Granelle d’Umanu, u ghjurnalettu di l’associu chì conta e numarose azzioni ch’ellu hà messu in ballu.
Perch’è, s’ellu hè puntellu frà tutti i so prugrammi, l’azzione à favore di a nò viulenza ùn hè a sola operata. Umani hà lanciatu dinù Terranea pè a salvezza di i patrimoniu naturali è di a terra. Aiuta i pastori chì tramàndanu i mèttodi nustrali d’allevu. Hà sustenutu a màndria di Pianellu d’un giòvanu pastore di 22 anni cù e so 120 capre. Hà un partenariatu cù a cuuperative Corsia di selezione pecurina. Sustene prugetti citatini cù i prugrammi Rifà di a Corsica un giardinu, Fiore di Murza o torna Una scola, un ortu.
Umani urganizèghja dinù cunferenze cù u prugramma Università di l’Omu. Hà creatu u prugramma Lingua Viva, da prumove è incuragisce l’amparera è l’usu di a nostra lingua, traduce òpere, creà è sustene prugetti, dà accessu à a nostra lingua. 9 libri sò stati selezziunati, tradutti è editati da Umani Edizione. Si ponu truvà in lìnea, nant’à a Banca di a Lingua Viva, un spaziu di scambiu chì permette à ugnunu d’amparà, perfezziunassi o sparte a lingua corsa (bancadilinguacorsa.org ).
Ci sò E Cullegiale dinù, chì permèttenu à zitelloni di prudùcesi in lingua corsa nant’à scene.
E Cullegiale 2024 anu da adunisce 18 cullegi corsi è 550 cullegiani !
U prugettu Ricordi Zitellini permette à zitelli d’arricoglie ricordi d’anziani corsi, arrigistrènduli da pudè spàrghjeli dopu nant’à una webradio in prugettu.
Umani sustene dinù Scola Corsa, Aiutu Studientinu, Tavignanu Vivu… È hà prugrammi in altrò cum’è l’associu « Les enfants de Birmanie » in Thailande.
Date forza à tutte st’operate umane fendu un donu à a Fundazione Umani ! •
