Vint’unu di marzu 2022… un annu fà, Yvan Colonna rendìa u so ùltimu soffiu in u so lettu d’ospidale di a Timone in Marseglia. Hè mortu in omu lìberu, ùn era più intravatu da u statutu DPS. Li avìanu cacciatu, dopu à avenne fattu una tomba per ellu… Hè mortu senza pudè rivede u so paese, rispirà u muscu di a so machja, sente u tintinnime di u so bestiame chì và à pasce in i lochi induv’ellu li piacìa tantu à purtalu, lasciassi accarizzà da u ventulellu nant’à u so visu puntatu versu u sole… Ssi piacè sèmplice ch’ellu hà tantu sunniatu à longu à sti 20 anni di chjusura inghjusta trà i quattru muri di a so prigiò. Hè mortu in u so lettu di dulore à nome, direttamente o indirettamente, d’un omu chì si ne mortu anch’ellu senza capisce nè u cumu nè u perchè, à 25 anni d’intervallu. 25 anni d’un fossu d’incumpreensione è d’odiu trà a Corsica è Parigi. I so dui destini sò stati leati da l’inghjustizia chì l’hà purtati ind’è a tomba. À chì ghjoveranu è à quale ssi morti ? In 25 anni, o ind’un annata, anu aghjustatu doli, suffrenze è guai à i doli, e suffrenze è i guai d’un ìsula marturiata da sèculi. Cumu sòrtesi di ssa malamorte ? Cumu truvà a forza di custruisce inseme un antru avvene chì quellu di e scelte mortifere ? Munsignore Francescu Bustillo, Vescu di Corsica, face sente a so voce. « Ignurà u passatu ghjè accurtà l’avvene. Ssi drami dulurosi cuntribuìscenu à sveglià e cuscenze » dice u nostru vescu. « Hè tempu d’unurà i vivi… hè tempu di salvà l’ànima di stu pòpulu, secondu à a tradizione biblica, da ch’ellu teni a so dignità è a so identità ». Ind’è a so lèttera à i prutagunisti di u prublema corsu, chjama a ghjuventù à fassi sente anch’ella, è aldilà, « e forze pulìtiche ed ecunòmiche, u mondu spurtivu è culturale, e cunfraterne, i muvimenti assuciativi, tutti i cridenti è i Corsi di bona vuluntà » à mette manu in pasta. « Simu i figlioli di a risurezzione » dice torna Munsignore Bustillo lampendu una chjama à l’intelligenza è à u core d’ugnunu. « Site forti » dice à i ghjòvani, imaginendu « una Corsica induve si pò campà in pace. Una sucietà induve l’uni sò cù l’altri è micca l’uni contr’à l’altri ». « Cari ghjòvani di Corsica, riparate a cunfidenza, create un tsunamì di speranza, imaginate una sucietà liberata, appacciata è ricunciliata »… U vescu ci prupone di fà di a pace « un mutore », è di l’amore un arnese per « trasfurmà e vite ».
È sè, in vera, a suluzione per sorge infine di i drami è i dulori, era l’amore è a cunsiderazione ch’omu pò avè da spàrtesi l’unu cù l’altru ? « Ùn pudemu micca scurdassi di a storia » dice torna Munsignore Bustillo, chjamènduci à tirà e lezzioni di sta storia. « A Corsica hà suffertu. Deve liberassi di i segni mortiferi da spusà u muvimentu d’una vita nova. Pè i Cristiani, l’ostàculi ùn sò micca strade senza sboccu, ma passagi », dice torna u vescu in un invitu à mette manu in pasta : « u cambiamentu ver di a speranza hà bisognu di l’ingagiamentu di tutti ». È ghjè sèmplice a sòsula : « ci vole a fede è a vuluntà ». Ùn saranu tantu sforzi insupranèvuli cù a cunfidenza è l’amore ch’ugnunu hà in sè. Sarebbe omancu mezu di dà un sensu à a morte d’Yvan è à quella di u prifettu…
À ringraziavi Munsignore. Chì a vostra voce fussi intesa. •
