Si n’hè andatu Antone Acquaviva, u 7 d’ottobre 2020. Averia avutu 100 anni di marzu pròssimu. Naziunalista di e prim’ore, indipendentista, ghjurnalista di talente, Antò era un amicu di a càusa corsa, è un amicu di tutti i naziunali. A so vita hè un parcorsu riccu d’ingagiamentu. Da a resistenza durante à seconda guerra mundiale di u ghjòvanu cumunista in u Maquis du Morvan, à a resistenza di pettu à l’oppressioni à fiancu à tutti i pòpuli in lotta contr’à u fascìsimu, è a resistenza naziunale pè u so paese di Corsica à fiancu à i s’amichi naziunalisti, Antone n’hà campatu lotte è revuluzioni !
A nostra amica, a so moglie, Michela Acquaviva-Pache hà scrittu un libru nant’à a vita di u so maritu, tenendu a piuma di e so Memorie (Mémoire d’oublis, Ed. L’Harmattan), induv’ella ci conta a longa strada d’un omu lìberu è cumbattente contr’à tutti i culunisatori. Ghjurnalista à l’Humanité, è citatinu ingagiatu, era à fiancu à u FLN algerianu, a lotta di liberazione di u Chili di Salvatore Allende, o quella di i Catalani contr’à u franchìsimu. Vultatu in Corsica, s’ingagia à u senu di a Lotta di Liberazione Naziunale è face ciò ch’ellu face u megliu : infurmà, scrive, cuntà, dinunzià à traversu U Ribombu Internaziunale ch’ellu porta cù passione è talente. Antone era un umanista, in lotta contr’à tutte l’inghjustizie, difensore di i più dèbbuli è perseguitati. Militente di a Lega di i diritti di l’omi, era ingagiatu pè a difesa di i migranti.
Testimognu di a stòria, avìa un mondu di cose à cuntà ! Riposa oghje in Lozzi, in a so terra niulinca. Pace eterna à tè fratellu, è cunduleanze afflitte è fraterne à Michela, è à tutti i toi. •