L’associu hè natu in 2015 da a vuluntà di parechji associ corsi di fà cunnosce è sparghje in Corsica i mèttodi di a strategìa Zero Waste in u mondu.
Waste, in inglese, vole dì à tempu lozzu, mullizzu, è spese senza cuntà. A parulla corsa « frazu » hà u stessu sensu. U scopu hè di mette a priurità nant’à a redduzzione di i lozzi, vale à dì ci hè un bisognu d’urganisazione per ammaestrà è cuntrullà ciò ch’ella costa, senza frazà nè u soldu pùblicu, nè e materie prime.
A vuluntà di Zero Waste hè d’incaminassi ver di una sucietà senza guasteghju è senza lozzu.
In fatti, Zeru Frazu piglia a sèguita di u Cullettivu citatinu contr’à l’incinerazione creatu in 2006 per dì nò à stu prugettu scemu di brusgià i nostri lozzi. L’associu hè dunque leatu à Zero Waste Europe è à l’alleanza glubale Gaia ch’aiuta tutte e dimarchje ch’anu u stessu scopu.
Hè una cullegiale chì l’anima, ma forse si cunnòscenu megliu e so purtavoce Colette Castagnoli è Dominique Loye chì danu senza cuntà per sensibilizà u pùblicu è pè u più l’eletti chì pìglianu e decisioni. U travagliu pò ci hè.
Animazioni, azzioni, manifestazioni, cunferenze, stùdii, Zeru Frazu face assai pedagugìa è spieca senza stancassi ciò ch’elli sò i sfarenti mèttodi di trattamente di u lozzu, ciò ch’elli còstanu, è a so efficacità, o nò.
Cusì Zeru Frazu scumbatte contr’à tuttu ciò chì, da vicinu o da luntanu, mette in perìculu e suluzioni e più astute ch’anu fattu e so prove, chì còstanu menu caru, chì ci permèttenu di francacci di u frazu allora chì u lozzu hè suvente una richezza da recuperà, per ùn impuzzichisce micca sìa a terra è l’acqua (sottuterrendu), o l’aria (brusgiendu).
Zeru Frazu loda a trascelta selettiva, à l’iniziu, vale à dì, ci tocca à spiccà i lozzi à u cutidianu, in casa, quand’è vo spuchjate i vostri legumi, o nettate i vostri piatti, sùbitu sùbitu ci vole à mette ssi lozzi detti bullitoghji per vìa di l’acqua ch’elli cuntènenu, ind’un stagnone nanzu di purtali in i centri di trascelta fatti apposta. Dinù i ghjurnali, u vetru, o l’imballasgi da tutte e mamme, di cartone, di plàsticu, d’aluminiu o di ferru, ci tocca à ricuperali in casa per purtali in i punti di trascelta.
Sè tutt’ugnunu fecìa què, lozzi ci ne sarebbe pocu è micca à trattà è l’incineratore o u sottuterramenu ùn si ne parlerebbe più…
Zeru Frazu face parte di u cullettivu Corsica Pulita ch’adunisce parechji associ citatini in zerga contr’à u pianu di prevenzione è di gestion di i lozzi di a Cullettività di Corsica.
Da nutà chì i dui associ di lotta contr’à a màffia, sò membri di Corsica Pulita. Vale à dì chì si tocca quì à u nodu di u prublema : trattà u lozzu hè un mercatu suchjosu è ci hè mondu soldu à fassi in u trasportu o u trattamentu (usine di trattamentu, centru di sottuterramentu, o incinerazione). Zeru Frazu dumanda à a Cullettività di Corsica di privilegià senza altra a trascelta selettiva. È basta. •
Infurmazione è cunttati : www.zeru-frazu.fr
