Una pulèmica hè nata in San Martinu di Lota in giru à a custruzzione d’un casale i pedi ind’è l’acqua. Appartamenti trà 450.000 è 850.000 àuri ùn sò alloghji suciali, in una cumuna in più ch’ùn ne hà micca… I scassi arruinèndusi u liturale, inzerghìscenu a ghjente chì dinunzia à puntu ssu bisognu d’alloghju di a ghjentarella nant’à a cumuna, sopratuttu pè i più ghjòvani. Dinunzia un urbanisazione periculosa ch’ùn tene micca contu di i rìsichi climàtichi è di l’erusione di u liturale. L’associu di i residenti « Aiutu pè a pieve di Lota » mughja u so stumacheghju nant’à e rete suciale è rimprova dinù à a cumuna è u so merre, Maria Elena Padovani, d’ùn avè pruvatu à cumprà u terrenu o d’ùn avè impeditu a so vèndita à un prumutore privatu. In quantu à a cumuna, spieca chi ssu terrenu era troppu caru è ch’ella ùn pudia frazà u soldu pùblicu. Dice dinù ch’ella ùn pudia impedisce ssa custruzzione legale da u puntu di vista di u Pianu Lucale d’Urbanìsimu di a cumuna. Spieca infine ch’ella hà un vantaghju per l’abitanti postu chè li permetterà di ghjunghje sin’à u mare è ch’ellu ci serà una nova piazza pùblica sopra à u casale.
Ssa pulèmica ci ramenta quant’ellu ci vole à esse attenti in tantu chè donne è omi pulìtichi, micca solu à a lèttera di a lege, ma dinù à u so spìritu. A lege ùn pò prevede tutti i detaglii di situazione ma cù d’altre lege dinù chì ci dèvenu spirà, indita e pussibilità di fà, o nò. À l’omi è à e donne di tene contu dinù di u cumu è u perchè di ssa lege è ciò ch’ellu hà ricercatu u legislatore. Ssa vuluntà chì s’appoghja nant’à custati è sperienze, parla di più chì e sèmplice règule ch’omu pò dassi. Hè cusì pè e règule d’urbanìsimu cum’è per parechj’altri duminii. Hè una cumplementarità chì ci permette di fà e scelte bone in a vita d’un omu, d’una cumuna, d’un territoriu, d’un paese. È ssu custatu ricola à i primi passi di l’Umanità cù e règule di a natura. Hè dinù ramintata ind’è i scritti bibbiichi. Santu Matteu conta in a vita di Cristu, i cumandamenti ch’arripresèntanu a lèttera di a lege è l’attitùdine interna di meditazione è di cuntrollu di sè chì ne face u spìritu. A tentazione si stalla ind’è u cerbellu di l’omi. U scopu hè di fà chì micca solu l’interdetti, ma dinù a vuluntà d’ùn francalli si stalla ind’è l’ànima sana. Montesquieu ind’è u so famosu « Esprit des lois » ne parla dinù è conta i sfarenti ipòtesi d’appiecazione chì li porta à cunclude : « hè una sperienza eterna ch’ogni omu ch’hà un putere hè cunduttu à prufittane pur’troppu… per ùn prufittane pur’troppu, ci vole chì u putere pianta u putere »… ghjè cusì ch’ellu brama frà altru un bisognu di separazione di i puteri legislativu, esecutivu è ghjudiziariu, è parechje assemblee chì si cuntròllanu è s’equillìbranu. Vale à dì ch’ùn basta à piattassi daretu à ciò ch’ella autorizeghja o nò a lege, ma ch’omu deve andà più luntanu è piglià in contu ciò chì sarebbe u più cunformu à u spìritu di ssa lege. Hè per quessa ch’ellu ci tocca à esse attenti à i grandi principi demucràtichi è ch’omu si dà documenti impurtanti nant’à e strategìe pulìtiche, cum’è, per un dettu, u Padduc, pianu d’accunciamentu è di sviluppu durèvule di a Corsica.
In fin’di contu, ssu spìritu di a lege per raportu à a so lèttera, si puderia chjamà u sumerinu, nò ? •
