Secondu i scientìfichi è i sèmplici osservatori, e nostre generazioni forse ùn videranu più i gorgoni in Mediterràniu… Hè una di e richezze di mare nostrum, è ssu custatu si vede particularmente in e reserve naturale. I sulleoni dapoi tutte st’annate, scàldanu micca solu l’aria, a tarra è i vegetali, ma dinù u mare. Sò veri « incendii » marini chì s’arruìnanu tuttu cù a crèscita di a timperatura di l’acqua.
Mòrenu e gorgone, ingiallìscenu, imbianchìscenu, vale à dì si viòtanu di a so vita chì li dava cusì belli cullori rossi, pòrpuri, innurati, viulini… furmendu fureste culurite è spetàculi strasurdinarii. Sò creaturi marini fragile, ch’ingràndenu solu d’un centìmetru à l’annu. U spetàculu magnìficu sottumarinu ch’elli ci anu offertu sin’à avà s’hè custruitu in decine d’annate è li ci vole omancu un mezu sèculu per ghjunghje à maturità, vale à dì quant’elle sò scaghjule. « Po dassi ch’ùn vidaremu più e grande fureste di gorgone » dice Jean Michel Cottalorda, biologistu marinu à l’Università di Nizza Costa d’Azura induve u disastru in u parcu naziunale di e Calanche si face sente dapoi un annu. Sò stessi custati in u parcu naziunale di Port-Cros è u parcu marinu di a Costa Blu. Istatina scorsa u Mediterràniu hè statu anurmalmente caldu, sin’à 30 gradi è sin’à 20 à 30 metri di prufundezza… Cunsequenza, e spèzie di pesci mìgranu, e spèzie d’algue dinù, mudifichendu l’ecosistemi marini, cù spèzie esòtiche invadente chì vènenu à ciambuttà tuttu.
A gorgona hè cucina di u curallu. Cresce sin’à più di 200 metri di prufundezza, cume branche d’àrburi furmate d’animali microscopichi chì s’aggròttanu inseme à millaie, furmendu culunìe in ramificazioni chì li fàcenu assumiglià à ventaglii splèndidi. Pàrenu grande fureste ch’aggròttanu torna 15 à 20 % d’altre spèzie marine. Dìcenu i scientìfichi chì ssi disguasti di timperatura princìpianu dinù à fassi sente nant’à l’erbaghji di pusidonìa ch’ingiallìscenu anch’elli troppu prestu. Ancu s’elli sò più zeppi è più resistanti, s’ella cresce torna – è dura – a timperatura di l’acqua, puderanu esse in perìculu anch’elli. Dinù d’altre spèzie cum’è e spunghe, i zini, u curallu. Puru i scogli curallini è e pusidunìe sò indispensèvuli à a fabricazione di l’ossigena in mare, filtrendu l’acqua è u rubu.
Quì torna dunque, u Mediterràniu si face indicatore di u riscaldimentu climàticu. Raprisentendu solu 1 % di i mari mundiali, mare nostrum aggrotta 18 % di e spèzie marine cunnisciute è conta a più grande parte d’abitati marini minacciati in Auropa. S’hè riscaldatu di un gradu l’ùltimi 25 anni. E previzioni tèmenu un riscaldimentu di circa 2,5 gradi à longu à u XXIu sèculu cù episodii tremendi di timperature di 30 gradi in a so parte orientale da quì à i pròssimi 25 anni. Riscaldimentu, vale à dì dinù acidificazione. Mare nostrum hà da cambià. Quellu di e generazioni à vene ùn serà più quellu di a nostra zitellina. Vale à dì quant’ellu ci vole à prutègelu, è à stà attenti à e pulluzioni per ùn impeghjurisce micca sta situazione. Cum’è tutti i mari, s’ingolla u carbonu di a pianetta è più ci n’hè, più s’addebulisce, menu pò resiste à a crèscita di e timperature. •