In Corti, Aiacciu, Bastia, Portivechju… a giuventù corsa s’hè mubilizata dumènica u 30 di nuvembre per prutestà contr’à a decisione di a Corte d’appellu di Marseglia chì vole impedisce a lingua corsa in Corsica ! Sindicati studientini, associi liceani, cù u sustegnu di i partiti pulìtichi naziunalisti, militenti culturali, sò cusì parechje centinaie di giòvani ch’anu manifestatu à i mughji « lingua corsa, lingua viva ! »
« Tocc’à noi di fà riagisce u Statu è di difende a nostra lingua » hà dettu Petru, liceanu bastiacciu. « Cumu pudemu accettà senza riagisce ? Cumu lascià sta ghjente decide di sguassà ciò chì ci unisce ? In tantu qu’alevu, in tantu chè citatinu, avemu u duvere di manifestà a nostra zerga. Micca cù a viulenza, ma cù un azzione forte, degna, pacìfica » hà dettu Petru Francescu, un giòvanu aiaccinu. « A Corsica s’arricurderà chì a nostra giuventù hè fallata in carrughju per difende a so lingua è a so cultura. A femu dinù pè e generazioni à vene, Evviva a Corsica ! » In Corti, sò dui altri liceani Carlu Antone è Battista, ch’anu parlatu à nome di tutti i s’amichi : « simu quì per mustrà chì sta lingua hè nostra è ch’ùn vulemu micca parlanne à u passatu, fendu sparisce u pòpulu corsu ».
Tutti sti giòvani corsi anu tenutu à dì chì a lingua hè di tutti è chì tutti dèvenu difèndela, micca solu i naziunalisti.
Luni, i giòvani ùn piantàvanu a mubilisazione, l’Università, ma dinù a maiò parte di i cullegi è licei èranu bluccati. D’altre manifestazioni s’appruntàvanu… è viulenza, vitture brusgiate è cazzuttate… anu disgraziosamente pigliatu a suprana…
U Cardinale Bustillo, Vescu di Corsica, hà chjamatu à l’appaciamentu, sprimèndusi in lingua corsa : « Cari giòvani, per piacè, ci vole à piantà sta viulenza… pè a pace, u Papa arriva, per piacè ».
Ghjuventù indipendentista hà intesu u messagiu è suspesu e so azzioni chjamendu anch’ellu à appacià : « ùn vulemu micca ch’issi mumenti di rivindicazioni pòschinu rimette in càusa di qualunqua manera i cundizioni di a vinuta di u Papa Francescu ».
In quantu à l’eletti, muzione unanima à l’Assemblea di Corsica, lagnanza in Corte di Cassazione di u presidente di u Cunsigliu esecutivu Gilles Simeoni, per pudè dopu dinunzià a pulìtica di a Francia contr’à e lingue di pettu à a Corte aurupea di Ghjustizia. Dinù, i presidenti di l’Assemblea di Corsica è di l’Esecutivu anu chjamatu inseme à una grande reunione à a Cullettività di Corsica per adunisce « l’inseme di e forze vive è l’istituzioni, sindicati di i studienti o liceani, gruppi pulìtichi, eletti parlementarii, merri, partiti, sindicati, associ, cullettivu Parlemu Corsu, attori culturali, Università, Cesec, Assemblea di i territorii, Assemblea di a Ghjuventù per travaglià inseme et riflette à una mubilisazione cullettiva da rinfurzà a dumanda di revisione custituziunale per cunsacrà a lingua corsa è a pulìtica linguìstica da mette in ballu in tutti i duminii per rinfurzà di fatti a cuufficialità ».
Vale à dì mette in ballu un operata cumuna da ch’ella campi a nostra lingua ! •