S’hè spenta Leila Shahid à l’età di 76 anni. Era a voce di a Palestina in Francia è in Auropa. À longu à una vita d’impegnu, Leila Shahid ci hà fattu cunnosce a Palestina fora di u solu cunflittu è di l’imàgine di terrurìsimu ch’ella soffre dapoi quasi 80 anni. Un paese, una stòria, un pòpulu, sguardi, surisi, sìntimi d’un pòpulu cum’è l’altri, ch’avìa dritti cum’è l’altri. Da a so pròpia stòria familiale è u so pròpiu impegnu, Leila incarnava u so paese, cù l’ochji, a voce, a determinazione d’una donna chì s’hè sempre battuta pè a libertà, a ghjustizia è a dignità di i palestiniani. Leila hà betu à a surgente d’una famiglia di militenti, cù un arcibabbone merre di Gerusaleme è deputatu à u parlamente ottomanu, un babbone è un ziu ch’anu luttatu contr’à l’occupazione inglese è anu raprisentatu u so paese nant’à a scena internaziunale in Londra, in 1939, pò à l’ONU in u 1948, una mammone ch’hà fundatu u muvimentu feminista naziunalistu palestinianu, una mamma infine, Sirine, militente impegnata anch’ella, ch’hè stata un riferimentu per l’ingagiamentu pulìticu di a so figliola è ch’hà scrittu un libru nant’à a famiglia, « Ricordu di Gerusaleme » chì porghje assai per cuntà a Palestina. Nata à u Libanu induve a so mamma era rifugiata, Leila ingrandisce culandi è ci face i stùdii. U so impegnu principia cù a guerra detta di i sei ghjorni in u 1967, trà Israele è i paesi àrabi, l’Egittu, a Siria, l’Irak è a Giordania. Ùn hà ancu 18 anni è s’ingagia tandu à u Fatah, u partitu di Yasser Arafat. In u 1968 face stùdii d’antropologia, è di sociologia pò cuntinueghja i so stùdii in Parigi. Frequenta intelletuali, universitarii, scrivani, sineasti… Volta à u Libanu in u 1982 spaventata da u massacru di i campi di rifugiati palestiniani di Sabra è Chatila da milizie falangiste alleate à Israele. In u 1989, Leila hè rapisentente di l’Organisazione di Liberazione di a Palestina (OLP) in Irlanda, pò in Olanda in 1990, pò à u Danemark, pò delegata generale di a Palestina in Francia da 1994 à 2005, infine à Brussela, à l’Unione aurupea da 2005 à 2015.
Tutta a so vita, hà parcorsu u mondu per difende i dritti pulìtichi di a Palestina è a pace trà i pòpuli, impegnèndusi dinù per difende a cultura è l’arte palestinianu. Leila difendia a suluzione à dui Stati cù una ricunniscenza para. Era u sìmbulu di a lotta di e donne palestiniane per l’emancipazione di u so pòpulu. « Gerusaleme era una cità universale è deve firmà una cità universale » dicia Leila, « ùn vogliu micca ch’ella sia a capitale di a Palestina, vogliu ch’ella sia una cità aperta à tutti, ghjè a so vucazione ». U macellu di u 7 d’ottobre, pò a vindetta israeliane è u genocidiu in Gazà sò stati d’una suffrenza tremenda per ella. L’Unione ghjudea francese pè a pace (UJFP) li rende umagiu parlendu d’ella cum’un esempiu.
Leila Shahid s’hè data a morte u 18 di ferraghju. « Hè morta di l’affannu, a còllera è l’imputenza », hà dettu Mediapart ripigliendu e parulle di i soi. Si dicia « strutta, viutata, spiantata parlendu di Gazà è di a Cisgiordania » dice u media. « Tumbèndusi, ùn hà micca rinunciatu. Hà solu sprimatu l’addisperu di a Palestina, pruvendu di tramandà una fiàccula fragile à e giòvane generazioni. Leila ùn hà avutu figlioli ma lascia millaie d’urfanelli, ridotti à leghje i so messagi è à stà à sente a so voce, da truvacci a forza di cuntinuà ».
Leila era una dunnona. Ch’ella riposi in Pace. •
• Leghje l’Accapu di a settimana scorsa
