I 10 anni, i 20 anni, i 30 anni, i 40 anni, i 50 anni… ed eccu i 60 anni ! Arritti camina dapoi più d’una generazione è parechje di quesse anu datu di u so sudore, di e so pene, di i so soldi, cusì tante straziere da pudè mantene ssu settimanale arrittu è decisu à sparghje l’edea autunumista ! Parechji frà elli ùn ci sò più, ma accumpàgnanu u nostru impegnu da tant’amicizie spartute, da i sacrifizii cuncessi, da e sperienze sparse, da e lotte è l’avvanzate. Arritti hè un pocu cum’una corsa induve ognunu si passa u testimognu da chì i giòvani pòssinu piglià a sèguita di l’anziani. Ghjè a cuntinuità d’un pòpulu è a so definizione. Cosa hè un pòpulu s’ellu ùn hè una cumunità di stòria, di lingua, di cultura, chì s’adunisce per inventassi un avvene, appruntassi lindumani di prugressi è di benestà ? Ch’elli sìanu ringraziati quì tutti quelli è quelle ch’anu partecipatu à st’òpera di custruzzione d’una pensata cumuna. À tè, lettore d’Arritti, ti pare sèmplice di truvà u to esempiàriu ogni settimana ind’è a to scàtula à lèttera… ma sàppia quant’ella dumanda sforzi è travagliu a rialisazione settimanale d’un mèdia d’opinione cum’è quessu. Da l’infurmazioni analizate à a reddazzione di l’artìculi mezu à tutte e tacche persunale cutidiane, trà a famiglia è u travagliu, chì Arritti ùn conta chè benevulenti. Senza parlà di a messa in pàgina è u travagliu di stamperia, a gestione dinù cutidiana, di a ricerca di sustegni, a rilancia di l’abbunamenti, l’inviu pustale, a vèndita in i chioschi, e fatturazioni di l’annunzii, i raporti cù a banca, eccèttera, eccèttera… Arritti hè un impresa. Ci si travàglianu una squadra di 6 reddattori, dui gestiunarii sott’à a rispunsabilità d’un direttore, Francescu Alfonsi. È solu un salariatu per via di l’imperiu bisognu di ricercà un sustegnu publicitariu chì dumanda un travaglione à tempu pienu.
Màssimu Simeoni hà fundatu ssu ghjurnale cù ssu spìritu quì, militente, ma cù a vuluntà di sempre migliurassi per andà à circà un pùblicu novu. U vulia cutidianu, e nostre finanze ùn pudìanu seguità. Hè statu dunque un settimanale ch’hà tracciatu u so solcu è ammanatu cusì a so lìnea edituriale à tempu chì u pòpulu corsu francava e sfarente tappe di u so sviluppu. L’autunumia ben intesa, quì, è in altrò per insignacci a strada, u drittu à l’autodeterminazione di i pòpuli, a ghjustizia suciale, l’eculugia, a diversità di e lingue è e culture, u meditterràniu è l’auropa, i nostri spàzii induv’ella cerca a so piazza a nazione corsa. Arritti hè forte di e so anàlise, di a stòria chì u porta, di l’infurmazioni ch’ellu sparghje.
Hè stata una vera scumessa d’avelu purtatu sint’à quì. Màssimu Simeoni era un visiunariu. Hà sappiutu nanzu à tutti l’arnesi ch’ellu abbisugnava u pòpulu corsu per fà avvanzà a càusa stòrica di a so emancipazione. Frà quessi, ci era u bisognu d’una stampa, urdignu indispensèvule à u svegliu di e cuscenze per purtà l’edea autunumista sin’à oghje è guarantìsceli un’avvene. Arritti hà cusì infurmatu, furmatu, sensibilizatu, strutturatu dinù.
Da u bigliettinu ch’ellu era 60 anni fà, u caminu hè statu longu è arditu. Ci sò stati strazii è guai, accumpagnendu e lotte, e gioie è i doli di stu pòpulu. È li ferma torna mondu sfide à affruntà. Senza i so lettori ùn hè pussìbule, Arritti ferma à u serviziu di u pòpulu corsu per trascrive e so brame è i so sogni. Vi demmu appuntamentu u 21 di nuvembre à u spàziu culturale Carlu Rocchi in Biguglia, da festighjà ssi 60 anni inseme. Venite ! •
