Una settimana una parolla
(O duie, o micca, sfidàtevi di e « parolle parolle parolle…»)
Pernette, pernette, va dire au bon
Dieu qu´il fasse beau demain.
Filastrocca sguìzzera.
Salute à tutte è à tutti. Sta settimana emu da parlà d’un culeotteru portafurtuna. U cunniscite tutti, hè u più spessu rossu pichjinatu di negru.
« Aghju trovu : a ciriola ». Bravu. Quandu una vulella si punia nanta’à a manu è pigliava u volu, era segnu di bellu tempu. In corsu, aghju buscatu 49 parolle sfarente !
Certe si riferìscenu à u volu di l’animale : Bolellucciu, Bulabulella, Bulellu, Vulavulella, Vulella, Calacalella, Mulinellu/a. D’astre tràttanu di u culore di u so mantellu : Bella viola, viola, pettigrisgiu, prunicella, ravanellu, fasgianella, rubinella, cuchjarella d’oru, stellina, o Cuccinella (eccune l’etimulugia : u grecu κόκκος (kokkos) « cocciniglia, tinta scarlatta » dà κόκκινος (kokkinos) « di culore rossu scarlattu », in latinu coccinus, po u latinu scentìficu coccinella). In quant’à u mantellu, si trova lumantellu, mantellò, mantellu, sciaccumantellu. Bartulumeu ramenta a ripresentazione di u santu : crucificatu à capu inghjò, spellatu vivu è scannelatu, porta a so pelle tale un mantellu. In quant’à San Martinu, si sà chì avia tagliatu u soiu da dallu à un puveracciu.
Sò dinù nomi d’astri animali : barabulella (farfalla), calvese, catalinetta (a cetonia aurata), vaccatella, vaccinella. Hè impurtante a relighjone : mumù di u nostru Signore (mumù hè una parolla zitellesca per mucca « vacca »), gallinella di u Signore, madunina, signurella, verginella, santalucia (si credia chì raccugliendu l’insettu è fèndulu vulà, dava pruttezione à a vista. À u cuntrariu, s’omu u tumbava avia prublemi à l’ochji). Infine, e sfarente parolle èranu liate à i zitelli : numarose sò e filastrocche mintuvendu a ciriola : « Cinciriola, ciciriola, piglia u sangue è caccialu fora. » ; « Cinciriola, cinciriola, induvina quant’anni aghju eiu ? » ecc. Hè da quessu chì a cuccinella hè dinù chjamata induvinaghjola, induvinella/u, duvinella.
Pare chì ci hè un liame particulare trà a ciriola è a scola : in Triveneto, si dice « l’ave maria va a scuola ». Ind’u Saluzzese, si cantava « parpaiola vola, vola, mustemè la via për endé a scola », (cuccinella vola vola, insègnami a strada per andà à a scola), è in corsu, truvemu « Ciriola ciriola/ Tù chì vai à a scola/ Puntu rossu è cartina/ Accompàgnami a matina ».
Per compie, eccu qualchì filastrocca :
https://www.youtube.com/watch?v=O5E8WmDCCo8
https://www.youtube.com/watch?v=s3B2O9kYzA4
https://www.youtube.com/watch?v=KN4UcxYQRz8
https://www.youtube.com/watch?v=yToAt5Ainbc
Marina Chovin.