Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
7 d’aprile 1865, si dice chì e truppe di Vittoriu Emmanuelle II invàdenu a cità eterna è u papa Pie IX scapperebbe in Corsica. Scrive L’Observateur de la Corse : « ne a riforma di Luther, ne quella di Calvin anu avutu u putere di sciappà l’unità di l’edea cristiana. Venendu ind’è noi, Pie IX ùn temerebbe di scuntrà in ssa terra uspitaliera nè prutestanti, nè ghjudei, nè musulmani… Mettendu i pedi in Corsica, Pie IX ùn sarebbe sott’à u cielu d’Italia ? Un senterebbe a lingua ch’omu parla in Roma ? » Per Carlu Castellani mai u dettu : « in tempu di guerra bugie quantu terra è in tempu di pace a verità tace », ùn hè statu cusì tantu ghjustificatu…. Ancu assai Napuleone III ùn si scorda di l’aiutu di u papa venendu à u so succorsu di marzu 1831. È quandu Garibaldi invadisce Roma, Napuleone III manda e truppe. Garibaldi si ritira è u papa cunserva Roma.
11-12 d’aprile di u 1814, rivolta pupulare. I capi di u muvimentu s’adunìscenu in a ghjesgia di San Carlu. « Ci hè stata a rivolta contr’à un guvernu inghjustu ; ci tocca à custituanne un antru » dice l’avucatu Frediano Vidau. Una ghjunta seguita chì pruclama l’indipendenza di a Corsica è dumanda a prutezzione di a flotta inglese…
12-15 d’aprile di u 1984, un Cungressu internaziunale nant’à u tema di « Bislinguìsimu è statutu di lingue regiunale in Auropa » si tene in Bastia. Hè urganizatu da Carlu Castellani è Guidu Dongradi missiunati da u Cunsigliu di a Cultura di l’Educazione è di u Quadru di Vita (CCECV) ch’hè statu messu in piazza di maghju 1983.
13 d’aprile – 10 di ghjugnu di u 1801, sò l’arrestati Miot cù misure fiscale pè a Corsica. André-François Miot, conte di Melito, hè natu in Versaille in u 1762. Di 1795, diventa ministru pienipotenzariu appressu à u grande Duca di Toscana è in u 1796 imbasciadore appressu à u Rè di Sardegna. Nanzu à rèndesi in Torinu, Bonaparte u manda in Corsica da mette in ballu e stituzioni francese. Miot sbarca in 1796 in piena notte in Petranegra, ci dice Carlu Castellani. Dopu à avè rimessu in marchja l’amministrazione, lascia a Corsica u 28 di marzu di u 1797.
Ma u 7 di ghjennaghju di u 1801, hè numinatu amministratore generale di a Corsica cù i pieni puteri. A so missione hè doppia : prende misure fiscale per salvà l’interessi di u Tesoru è ristabilisce l’òrdine pùblicu. Sbarca dunque in Calvi u 25 di marzu di u 1801. Qualchi ghjornu dopu, in Aiacciu, di fronte à l’autorità dice : « Ormai l’avvene pare più serenu pè a Corsica… è site à u principiu di a prusperità in grazia à a vostra pusizione è à a vostra unione cù a Francia ». À quell’èpica, conta sempre Castellani, e gattive racolte si succèdanu, a robba da manghjà hè cara è scarsu u soldu. L’impòsiti ùn èntranu micca. L’assassinati sò numarosi è u ricordu di Paoli sempre vivu, nutrisce e rivolte. « Per megliu capisce l’abitanti di stu paese, provu à cunnosce a so lingua è ùn mancu un occasione per osservali » dice Miot. Prende cusì una sèria d’arrestati fendu « un òpera legislative chì u ferà passà à a posterità » dicerà in u 1990 Luigi Orsini. A so missione compie, imbarca per Marseglia u 24 d’ottobre di u 1802. •
