A settimana scorsa, u Parlamentu aurupeu hà adupratu à una corta magiurità a Lege di restaurazione di a Natura. Hè una vera vittoria chì i lobby industriali, pè u più quelli di i pesticidii, li anu fattu guerra. I pronostichi di stu votu èranu piuttostu gattivi è a lotta trà i prò è i contri hè stata dura. Infine chì a lege hè stata aduprata cù 336 voti contr’à 300. Hè simbòlicu ma impurtantìssimu assai. Ma cosa hè sta lege ?
Prima ci vole à sapè chì sparìscenu à una vitezza strema l’insetti pullinisatori : una spèzia d’apa o di farfalla nant’à deci sò in traccia di sparisce cumplettamente è più di 80 % di l’abitati naturali aurupei sò in un gattivu statu. Ci vole à cambià di versu, in fùria da pudè assicurà a vita, micca ind’è sèculi à vene, chì l’affare si ghjoca oghje !
L’inghjocu ùn hè solu pè a natura, ma pè a pianetta sana chì i benefizii di sta lege vàlenu pè a lotta contr’à u riscaldimentu climàticu chì minaccia l’Umanità.
In u so ùltimu raportu, l’esperti di u GIEC dìcenu chì a restaurazione di l’ecusistemi hè una di e suluzioni per sminuisce di manera efficace a crèscita di e timperature. Dice WWF : « sapemu chè n’avemu bisognu di l’ecusistemi in bona salute da ch’elli ingòllinu u carbonu. N’avemu bisognu dinù per dà di pettu à u riscaldimentu d’oghje. E zone ùmide permèttenu di luttà contr’à l’inundazioni, l’àrburi ci permèttenu di dà di pettu à i sulleoni… ùn hè solu una lege pè a natura, ma dinù pè u clima è pè i citatini. »
A lege prevede a restaurazione di 20 % di e terre è di i mari di l’Unione aurupea da quì à u 2030, è di tutti l’ecusistemi scempiati da quì à u 2050 : 30 % da quì à 2030, 60 % da quì à 2040, 90 % da quì à 2050. Dumanda à ciò ch’elli sìanu particularmente curati certi lochi in gattivu statu cum’è l’ecusistemi custieri d’acqua dolce o marinu. U documentu brama di caccià tutti l’ostàculi messi nant’à i fiumi è i fiumicelli da pudè pullisce 25.000 chilòmetri è ch’elli pòssinu corre di manera linda. Dice dinù ch’ellu ci vole à piantà a pèrdita di spazii verdi in e cità è à arrestà sopratutttu a sparizione di l’insetti pullinisatori da quì à u 2030.
Sta lege di a restaurazione di a natura face parte di u « Pattu Verde » aurupeu*, è vole dà un antru versu di pettu à tuttu u nostru ambiente chì si sfonda. U scopu hè d’assicurà a cunservazione di e fureste, e campagne, i fiumi è fiumicelli, u mare, da prutege a biodiversità è di luttà contr’à u riscaldimentu climàticu. Qual’hè chì puderìa esse contru ? Puru si sò scatinati tutti i lobbì industriali chì fàcenu passà u so prufittu privatu nanzu à a natura è a salute di a ghjente. Sò milliardi in ghjocu per elli è u soldu, si sà, hè rè in u nostru corciu mondu. U grande capitale s’hè mubilizatu, raprisentatu ind’è e stituzioni aurupee da a Dritta è da a Strema Dritta chì si sò ligate per impedisce u votu di sta lege. Una campagna di false infurmazioni hè stata scatinata cum’è mai. Ancu assai l’associi di difesa di u clima è di l’ambiente si sò mossi è a lege hè stata vutata.
Puru ci hè dinù un interessu ecunòmicu pè e Stituzioni aurupee. U costu di sti scopi per restaurà a natura, hè stimatu à circa 154 milliardi d’àuri, ma e misure ch’elli indìtenu ponu porghje un benefiziu di circa 1860 milliardi d’àuri ! Vale à dì chì s’ella tocca à a sacchetta di l’industriali, sta lege face prò à i purtafoglii aurupei in più di l’urgenza eculògica. « A lege nant’à a restaurazione di a natura hè una necessità pè u clima, per tutti l’Aurupeani è per tutti i territorii di l’Auropa, terrestri o marini » hà dettu Francescu Alfonsi di pettu à a Cumissione nanzu à u votu, « vogliu insiste nant’à e cunsequenze di u riscaldimentu climàticu in u Mediterràniu induve campu. I climatologhi l’anu detta, ghjè quì chì u disguastu serà u più grande. L’erbaghji di pusidunia in u Meditterràniu fòrmanu un patrimoniu eculògicu eccezziunale cù un putere di captazione di u CO2 u più altu ch’ellu sìa. Stu patrimoniu cuntinuèghje à ridùcesi nant’à a pressione di l’attività ecunòmiche umane. Ùn ci volerebbe mètteci fine di manera urgente ? Mette in appiecazione à u più in fùria una legislazione rigurosa di restaurazione di a natura, eccu ciò chè no puderemu fà cù sta lege. Senza sta lege, a destruzzione hà da cuntinuà. »
Cù stu votu u parlamentu aurupeu entre in neguziazioni cù a Cumissione aurupea (vale à dì i Stati aurupei) da mette in ballu riforme cuncrete. In fine di contu, sò i Stati chì decìdenu di e misure di u pianu d’azzioni ugnunu in u so territoriu. È si sà chì troppu spessu rincrèscenu à st’avvanzate… Vale à dì chì tocca à noi altri, citatini aurupei, di mantene à pressione à u latu di l’associ è l’eletti eculugisti, da e nostre mubilisazioni è da i nostri voti dinù : simu noi chì mettimu in piazza l’eletti è i guverni chì dopu fàcenu viaghjà l’Auropa.
Stu votu hè impurtante è dà un indiatura forte. Bramemu chì a sèguita sìa ancu di più vuluntaria… Ma ci hè di chè à dassi penseru chì dritta è strema dritta sò à capu di i sundagi pè e pròssime elezzioni aurupee… •
F.G.
* U pattu verde o green deal in inglese, hè statu adupratu di lugliu 2021, in sèguita à e decisioni di l’Accordu di Parigi in 2015 per riempie l’ingagiamenti presi tandu di limità u riscaldimentu climàticu à 2°C, o megliu, à 1,5°C. U primu scopu di ssu « Pattu Verde » hè di riduce da quì à u 2030 l’emissioni di gasu à effettu di serra di 55 % per raportu à i so livelli di l’annate 90. Un antru scopu hè di tuccà a neutralità carbone in u 2050. Frà i mezi, ci vole à fà pacà l’imprese pulluante è aiutà i più pòveri da ch’elli pòssinu fà i sforzi per riduce a so cunsumazione energètica.
