Tavignanu vivu

Sustegnu di a merrìa di Bastia

U 29 di lugliu scorsu, u Cullettivu Tavignanu vivu, a Fundazione Umani è l’associu Terres de lien Corsica / Terra di u cumunu anu pruclamatu i dritti di u fiume Tavignanu. Mondu a ghjente frà i quali eletti di Corsica o d’altrò anu ziffratu sta dichjarazione simbòlica ma chì si scrive ind’un slanciu oghje mundiale di ricunniscenza di i diritti di a natura è di a necessità di priservali. Tavignanu hè u secondu fiume di Corsica, hè riccu d’una grande biodiversità è hè minacciatu oghje da un prugettu industriale di sutterramentu di lozzi casalini è di lozzi di tigliu o di terre tigliose. Ssu prugettu scemu, nant’à e sponde di u fiume, chì sò terre instàbile induv’ellu ci hè sempre statu sripate, hè un perìculu per tutta a piaghja chì ghjè ricca di pruduzioni agrìcule. L’agricultura dunque, u turìsimu, u benestà di a ghjente, e risorze in acqua putàbile, l’ambiente di sti lochi sò minacciati è pare un affare tamant’à u mondu d’avè pensatu fà un prugettu sìmile quì ! A merrìa di Bastia porghje anch’ella u so sustegnu à u Cullettivu Tavignanu Vivu è à a dichjarazione di i Dritti di u fiume.

U cunsigliu municipale hà adupratu una muzione u 10 di nuvembre scorsu cù uni pochi di cunsiderendi amentendu a storia di e nostre lotte per l’ambiente, l’impurtanza di a natura ind’è a nostra sucietà, è a celebra frasa di u scrivanu Antoine de Saint-Exupéry : « ùn simu l’eredi di a terra di i nostri babbi, ma a pigliemu in prèstitu à i nostri figlioli ». Arritti feliciteghja a cumuna di Bastia è chjama à tutte l’altre cumune d’avè listessa dimarchja per sustene i dritti di u Tavignanu. Aiutèmuci ! Eccu a muzione.

 

« U cunsigliu municipale :
– Sustene a dichjarazione di i diritti di fiume Tavignanu di u 29 di lugliu 2021.
– Ricunnosce Tavignanu da entità viva è indivisìbile da l’ochju sinu à a foce, delimitata da u so bacinu versante è dispunendu di a persunalità ghjurìdica.
– Vole chì u Sgiò Merre di Bastia si possa assucià à tutte l’azzione messe in anda da u Cullettivu Tavignanu vivu, Umani è l’associu Terres de lien Corsica – Terra di u cumunu, purtadori di a Dichjarazione di i Diritti di fiume Tavignanu di u 29 di lugliu 2021.
– Vole chì u Sgiò Merre si possa assucià à tutte l’azzione battendu à prò di u principiu di precauzione per e situazione sìmile. »  •