Avucatu in prima ligna davant’à a Corte di Sicurezza di Statu durante u Prucessu d’Aleria, Lucien Felli fù pà u sempre un avucatu di a càusa di u pòpulu corsu. Naziunalistu à mezu à d’altri intillituali in Parigi quandu elli sò nati i primi muvimenti cursisti à a fine di l’annate sissanta, Lucien Felli era assai apprizziatu cum’è militante è com’è amicu, sempre prontu à discorre, senza mai alzà a voce. Puliticamente, hè statu vicinu d’Edmond Simeoni è hè statu un elettu di u primmu gruppu naziunalistu di a primma Assemblea di Corsica in 1982. Uriginariu di Bastèlica, fù dinù l’amicu di Marcellu Lorenzoni è u so avucatu dopu à l’affare Bastèlica-Fesch. Tandu s’hè staccatu di l’Unione di u Pòpulu Corsu è s’hè avvicinatu di l’urganisazioni di a Lotta di Liberazione Naziunale. Eppuru, ùn hà mai persu l’amicizia di i so cumpagni di lotta, quale ch’ella fussi stata a so strada pulìtica parsunale. A malatìa di u coronavirus l’hà toccu in Parigi è ne hè mortu. Avìa 74 anni.
Cundulianze fraterne à i so figlioli, à i so fratelli è à tutti i soi.