Amparemu cù una grande tristezza a morte di Guy Ceccaldi, u « pidone di Ghjirulatu ». Tutti quelli chì l’hanu scontru un ghjornu falendu à trunchera di collu cù a so musetta di a posta par purtà lèttare è pacchetti à Ghjirulatinchi sanu parchì « facteur » in corsu si dice « pidone » ! Guy, a so turnata, l’hà sempre fatta à pedi, guasi currendu durante i sette kilòmitri di a strada pidestra chì và da a Bocca à a Croce à u paese di Ghjirulatu.
Era divintatu Guy un sìmbulu.
In Ghjirulatu, si capisce : par st’abitanti spiccati da tuttu, Guy era a leia, è una prova cutidiana chì a sucetà ùn si scurdava di ssu paese alluntanatu. Pà a Posta, era divintatu dinù un sìmbulu sguasi publicitariu : Guy simbulizava u « serviziu pùblicu » par tutta a Còrsica.
È pà i turisti, cù a so barba magnìfica, a so garbatezza naturale è u so surrisu sempre amicale, era divintatu una prisenza appriziata. Quant’ellu ne hà fattu fottò è filmi ! È par noi « le chemin du facteur » firmarà par sempre !
Sta cilibrità l’hà sempre ammusatu, Guy sapìa l’affizzione chì tutti li purtàvanu, paisani cum’è turisti, è ne era felice. Simpliciamente.
Arritti manda e so cundulianze afflitte à Annie è à tutti i soi.