U mese d’ottobre hè u mese di u càncaru.
In Corsica dinù. Da a Lega contr’à u càncaru à a Marie’Do, passendu da l’Ottobre ròsulu cù tutte e marchje è e corse urganizate un pocu dapertuttu, a sucetà prova à vultassi contr’à ssa malatitaccia è ugnunu chjama à a mubilisazionie per dà forza à a ricerca.
In u mondu, i càncari raprisèntanu a prima càusa di murtalità per l’omu, a seconda pè e donne. Si cuntàvanu in 2022 quasi 20 millioni di càncari novi buscati, è 9,7 millioni morti. U càncaru di i pulmoni vene in prima cù 2,5 millioni càncari novi (1,8 millioni morti), pò u càncaru colorettale (900.000 morti), u fècatu (760.000 morti), u pettu (670.000 morti), u stòmacu (660.000 morti). In Francia dinù, i càncari sò a prima càusa di murtalità per l’omu, a seconda pè a donna. In 2023, si cuntàvanu 433.000 novi càncari. 57 % tuccàvanu l’omi, cù u càncaru di a prostata in prima, u càncaru di i pulmoni dopu è i càncari colorettali in terza piazza. U più frequente pè e donne, hè quellu di u pettu, pò u càncaru colorettale vene in secondu, è infine quellu di i pulmoni in terza.
Frà e càuse e più impurtante di càncaru murtale, di sicuru, u tabaccu, l’alcolu o un alimentazione sregulata fèrmanu i rìsichi i più forti. Ma, ancu s’ellu hè diffìciule à fanne a prova, i fattori ambientali sò dinù càuse impurtantìssime. Dice l’Organisazione Mundiale di a Salute chì a polluzione di l’aria, per un dettu, hè rispunsèvule d’un mortu nant’à sei in u mondu, è e càause ambientale rispunsèvule di 19 % di i càncari. L’agenti cancherogènii cum’è u tigliu, u radon, u cadmium, l’arsenicu, sò cunnisciuti, ma dinù pare certu di più in più u rolu di i pesticidii o di e nanoparticule. A ricerca prova à fanne a dimustrazione. Misurà u rìsicu d’esse in cuntattu cù prudutti chìmichi, fìsichi o biològichi hè puru diffìciule. Ma l’inghjochi sò maiò, in vite umane, è in spese pè a sucetà. Cusì, si multiplichèghjanu stùdii è inchieste. È si fàcenu cuncurrenza parte di l’urganìsimi di difesa di a salute, è disgraziosamente dinù, parte di i lobbì industriali chì si « còmpranu » certi scientìfichi. Misurà u tempu d’espusizione, dinu almanaccatu à parechji agenti chìmichi, è i rìsichi ch’elli raprisèntanu pè a ghjente, hè una vera scumessa. Ancu di più quand’ellu s’agisce di l’esposomu, vale à dì misurà l’inseme di l’esposizioni à ssi rìsichi à longu à a vita d’una persona.
Disgraziosamente torna, a puvertà hè un rìsicu di più.
In i paesi induve l’indiziu di sviluppu umanu hè più dèbbule, si more più facilmente d’un càncaru, per vìa ch’ellu hè scupertu troppu tardi o chì u prezzu di u trattamentu impedisce di curà a ghjente. Cusì i càncari murtali duverìanu duppià da quì à u 2050 in i paesi cù un indiziu di sviluppu umanu più dèbbule. « I paesi cù risorze e più dèbule seranu i più crudamenti tocchi da a càrica mundiale di u càncaru » dice u Centru Internaziunale di Ricerca nant’à u Càncaru. L’inghjustizia tremenda di a puvertà s’aghjusta à quella di a malatìa.
U càncaru hè pruvucatu da una cèllula chì si trasforma di manera anurmale, pò si multiplicheghja è pruduce altre cèllule anurmale chì si multiplichèghjanu anch’elle. Si capisce chì u male pruspera in fùria tandu. Sbuccalu à u più prestu pussìbule aumenta a scenza di pudè vìncelu.
Vistu tuttu què, si capisce chì a cuurdinazione antimàffia appii paragunatu a màffia à un càncaru. •
