Corse-Matin è a so squadra di ghjurnalisti corsi c’hanu fattu una surpresa bella è bona ghjovi scorsu cù a surtita di a prima edizione di « u Nutiziale », à mezu à e pàgine di u cuttidianu lettu ogni matina da a più parte di i Corsi.
U Nutiziale sarà misincu, mà hè vera chì u fattu ch’ellu sìa prisintatu à mezu à u ghjurnale abittuale li dà una impurtanza particulare.
Annant’à ottu pàgine, u Nutiziale hè scrittu sanu sanu in lingua corsa. C’hè l’edituriale di Ghjilormu Padovani, è una dodecina d’articuli parlendu di tuttu : cultura, sportu, internaziunale, suciale, ecunumìa è fatti di sucetà. È, par finisce, una intervista di Marcu Biancarelli. In più di Ghjilormu Padovani, ci vole à mintuà, è à filicità, l’altri redattori di ssu primu nùmaru : Julian Mattei, Paul Mathieu Santucci, Jean Philippe Scàpula, Jean François Pacelli è Pierre Negrel.
Fà sorte u scrittu in corsu da u spaziu sculare hè u scopu di st’iniziativa, si pò dì militante, cum’ellu a spiega Ghjilormu Padovani : « (a lingua corsa) ci vole à fà la sorte da e scole pà ripiglià fiatu in carrughju. Deve viaghjà annant’à e so dui ghjambe, u parlatu è u scrittu ».
Esse in u ghjurnale : si sà l’impurtanza di ssa ricuniscenza pà a lingua. Sò numarosi quelli chì a pàrlanu pròpiu bè ma chì un a sanu ne leghje ne scrive: par elli hè l’uccazione di francà u passu è li sarà più fàciule d’amparà cusì prima à leghje, è dopu à scrive.
Sò dinù numarosi quelli chì hanu fattu un pocu di corsu à a scola, è pò più nulla o guasgi dopu. U nutiziale sarà par elli un mezu par ripiglià u filu di l’amparera, è, forse, di a pràtica.
È pò servarà ancu à a scola : s’hè intesu dì à un insignante di lingua corsa à u forum d’RCFM ch’ellu avìa cumpratu 25 ghjurnali par distribuìlli à i so alevi : li servarà pà i so corsi di corsu u Nutiziale, appughjèndusi annant’à testi chì pàrlanu di i pinseri è di e priuccupazioni d’ogni ghjornu di i zitelli.
Fendu sorte u scrittu in corsu da i manuali sculari, u Nutiziale di Corse Matin rinforza assai una dimarchja più sparta è più inclusiva à favore di l’usu è di l’amparera di a lingua.
Par ch’ella campi a nostra lingua !
F.A.
