Hè natu un associu novu di « difesa di l’identità è di u solcu culturale stòricu di i Corsi ». Adopra mezi universali da fassi cunnosce è spannà e so anàlisi : « spartera, riflezzioni, publicazioni è scontri ». Spieca a so pàgina Facebook ch’ellu hè « natu da l’incontru di militenti, universitarii, persunalità impegnate è sìmplici appassiunati di stòria, a stòria di l’Omi in generale, a stòria di a Corsica in particulare ». Dice l’unu di i so funditori, Niculaiu Battini, « aduniti, vulemu prupone à a nostra cumunità un inseme di cuntribuzioni scritte, filmate è arrigistrate ». Arritti saluta st’iniziativa pròpiu di natura à riacquistà a nostra stòria è cù ella ciò ch’hà scultatu a nostra identità cullettiva. Niculaiu Battini risponde à e dumande d’Arritti.
Avete creatu Palatinu, per chì scopu ? Prisentàteci l’associu.
Palatinu si dà per missione di difende è di valurizà a cuscenza cullettiva di i Corsi à traversu u racontu di a so stòria è l’adopru d’una storiografia paisana è lucale. Avemu parechji dibàttiti à rimette nantu à u tavulinu, a sapete. Pigliemu l’esempiu d’Alalia, fundata da i Grechi ? Sicura chè nò, c’era una vita quì quandu ch’elli sò ghjunti i Grechi, c’era una cità corsa chì hà accoltu i Grechi è chì s’hè ligata cun elli per via di u cumerciu, ma una presenza umana c’era digià. Pudemu mintuvà i Truschi, chì sò stati senza nisun dùbbitu a prima civilizazione maiò cunnisciuta à avè impastatu a cultura prelatina in Corsica, si ne parlava pocu ma cresce una mossa à favore di quessa è a sustenimu attivamente. Napuliò : chì piazza dalli in u racontu identitariu ? Cuntinuà à cunsiderallu cum’è una nemesis di Paoli, per sìmplice anacrunìsimu ideulògicu o ritruvà a versura chì cunsistia à fanne u sìmbulu di u gèniu cullettivu di i Corsi è u cuntinuadore in Francia è in Auropa di l’òpera di Paoli ? Vedimu, c’hè materia da discute è sò tutte ste quistioni ch’emu da mintuvà da prupone a nostra pròpia lettura, identitaria è fattuale.
Palatinu addunisce parechje ghjente appassiunate, chì seranu e vostr’azzioni da pudè fà cunnosce megliu a nostra storia ?
Emu da avè dui grandi azzi d’azzione. U primu, l’etnico-culturale, vale à dì e cumemurazioni, e cunfarenze, l’evenimenti culturali. L’8 di dicembre in Corti ch’emu digià previstu è chì vene prestu, e grande feste cristiane, a nàscita o a morte di i grandi persunnagii di a Corsica, Sampieru, Vincentellu, Giudice, Circinellu, Paoli, Napuliò è numarosi altri. U sicondu azzu, serà di natura più ghjurnalìstica è pulìticu senza esse partigianu. Mettimu in ballu una scena youtube chì publicherà l’interviste d’omi è di donne investiti in pulìtica o in a vita pùblica sprimèndusi nantu à u so raportu à a stòria è à l’identità di a Corsica.
C’hè un bisognu di vultà à e nostre ràdiche è ritruvà l’ànima di i nostri paesi ?
Sicura. Ma ’ssu bisognu ùn currisponde à nisuna situazione particulare. Hè. Esiste. Hè strutturante. Prucede di a necessità per l’Omu di piazzassi inde u spaziu è u tempu. Simu identitarii in u sensu chè no tenimu u raportu à u fattu cumunu, prisente, passatu è futuru, cum’è una necessità vitale, quant’è di manghjà è di beie.
In u cumbugliu di a mundializazione è a pèrdita di valori, i referimenti à a storia è à a cultura ponu indità novi cumpurtamenti à u senu di a nostra ghjuventù. Cumu rende mudernu ciò chì ci hà custruitu in tantu chè pòpulu ?
Parlèndune è fèndune a promozione ! Sapete, simu particularamente ammirativi di tuttu u travagliu di vulgarizazione fattu da certe scene Youtube cum’è Nota Bene, vulemu produce qualcusella chì vachi inde stu sensu in Corsica. D’altronde, c’hè materia da sfruttà, mintuveremu l’eccellente travagliu di Marcandria Castellani nantu à l’onde di RCFM, ricunnisciutu da tutti, salutatu è seguitatu da numarosi auditori. Ci vole à strutturà è prumove ste manere, andendu più luntanu per via di l’urganizazione di stonde d’incontru è di spartera. Fatta fine, suciabilizazione, mossa cultura, arnese numèricu è travagliu universitariu, tuttu deve viaghjà attempu inde un uggettivu cumunu : alimentà a cuscenza cullettiva di i Corsi.
Oghje i capatoghji sò piuttostu truvà un travagliu, avè un alloghju, pudè gode di a vita oghjinca… eppò ci sò i penseri di u mondu, u climà, l’immigrazione, l’islamìsimu… Cosa ci entre l’identità per truvà risposte à i malanni di stu mondu ?
L’identità hè è sera sempre una quistione fundamentale per l’individu è a so cumunità, sempre. A prima cosa ch’omu dumanda quandu si scontra à qualchissia hè u nome è a casata. L’individu hè ligatu à una rèdita ch’ellu sceglie pocu è micca è ch’ellu interrugheghja in permanenza. Quale sò, di quale sò, da duve vengu ? Ognunu ci pensa sinu à l’ùltimu ghjornu. Tandu l’identità, sia individuale sia cullettiva, ùn vene micca da apportu perifericu, hè u centru di a vita è di l’esistenza. E cullettività è e personne chì pàtenu una mancanza identitaria sò prive d’un puntellu indispensèvule di sviluppu, di felicità è di spannamentu.
I naziunalisti sò à e rispunsabilità di u paese dipoi 6 anni tinendusi guasi tutti i strumenti, regione, trè deputati à l’Assemblea Naziunale, un senatore, un deputatu auropeu… averemu sempre bisognu di l’associi per scumbatte ?
Hè un paradozzu, ma più chè mai. Forse di più ch’arimane. I dirigenti di a Corsica ùn dispònenu micca di u so Ministeriu di l’Insegnamentu, tandu u raportu di forza ùn hè tantu cambiatu. Chì pò fà un deputatu, un senatore, o un cunsigliere territuriale senza i mezi stituziunali di prumove una vera andatura di ricunquista stòrica ? Parlemu tandu di tutta a pertinenza è di a necessità di l’Autonomia, dinù in tèrmine d’insegnamentu stòricu. C’hè un discorsu oghje chì corre, chì pratende chì a stòria corsa hè insegnata in scola. Sò bugie o esagerazioni. Ùn esiste nunda di tale. Chì mezi anu l’eletti corsi da cambià st’affare ? Sò pochi. Esìstenu d’altre soluzioni ? Per contu nostru, e Scole Corse, private è assuciative, chì nàscenu è quelle ch’anu da nasce sò una grande cagiò di sperà. D’altronde emu previstu di sustene di modu accannitu ste dimarchje quì cù a voglia d’arrichisce u cuntenutu stòricu chì serà prupostu. Ma fatta fine, tuttu ùn si deve aspettà di l’eletti è di e stituzioni. Tocca à i Corsi, cù u spiritu d’impegnu è di dinàmica, di move dinù di per elli è l’identità n’hè un mutore essenziale.
Qualessi sò i vostri pròssimi appuntamenti è obbiettivi ?
U nostru primu appuntamentu casca l’8 di dicembre in Corti. Simu in traccia di finalizà u prugramma di a ghjurnata chì serà publicatu à mumenti. Vìsite patrimuniale, cunferenze stòriche, spuntinu, leia cun Praticalingua Corti, A Rinascita, Robba paisana. A nostra lògica hè di tesse rete assuciative trà strutture chì spàrtenu u listessu zòcculu di valori, l’identità, u lucale, u patrimoniu, l’agricultura di produzione, a lingua corsa, etc. Pè a sèguita, emu creatu un spartitempu di cumemurazioni, a morte o a nàscita di l’umoni di a nostra stòria cum’è Sampieru, Paoli, Vincentellu d’Istria o Napuliò, i grandi evenimenti tale chè Ponte Novu, U Borgu, a battaglia di u Vechju pè a Riventosa… Ùn mancheremu di travagliu, è simu intesi cù i Corsi da ritruvacci suvente da difende ciò chè no simu ! •