L’anniversariu d’Arritti hè statu colmu di surprese è rigali. Per ramentà a bella serata appruntata da i nostri amichi Minicale et Ghiseppu Turchini, eccu, amichi lettori ch’ùn avette pussutu vene, u prugramma è i testi magnìfichi ch’elli ci avìanu appruntati per cuntà, à a so manera, ssi 50 anni di lotta in cantu. Una manera di lampà un ochjata nant’à a nostra storia cusì ricca. À ringraziali tremindui è à ringrazià musicanti è cantarini* per ssu rigalu tamantu chì tamanta fù a nostra strada!
Tamantu piacè di vedevi cusì numerosi sta sera. Tamantu piacè cum’ella fù tamanta, a strada chì un populu arditu, fieru è cuscente, decise di scrive cinquanta anni fà. 50 anni chè n’emu da circà à ramintavvi, da falli turnà à campà è misurà ciò ch’elli arriconu di lotte è di speranze, sin’à sbuccà è sbuccià nant’à l’avenimentu maiò di u sperà. « Tamanta strada ! », disse un figliolu di stu populu, eredu è oramai garante di st’abbriu cumunu, mughjendu da in fondu à lu so pettu a gioia di a vittoria, u sullevu di a cunquista, l’omagiu à tutti quelli chì fecenu chè no ne semu quì oghje. In core à sta sulcata, una paruzione indiata, tistarda, pugnace, nata un ghjornu propiu simbolicu, l’Ottu di Dicembre, à dui passi di quì, per ste strette bastiacce, portavoce di a so ghjente è bandera stesa di l’affirmazione. U so nome ribombò subitu cum’è un’esurtazione sacra, una chjamata antica : Arritti ! À traversu à e so pagine, testimunianza unica è preziosa di tanti passi è acquisti nustrali, leghjeremu tutti inseme, sè vo a vulete, sta sera, a Storia còrsa, a Storia côrsa, chì ci invita ormai à scrive torna, sempre è inventà, prugressà è sunnià, infine ! Da guidacci nant’à i chjassi di a memoria, canterini famosi è talentosi chè vo scuprerete manu à manu. U fiorfiore di i musicanti lucali, una sguatra di ferru : Minicale da capu d’orchestra, Cristofanu Macdaniel, Anghjulu Torre, Anghjulu Bianchini è Freddì Olmeta. È po da sopr’à a scena, un screnu duv’elle si spechjeranu tante fiure da rimembrà u filu di u tempu. Ma aghju dettu abbastanza, avà hè ora d’avviacci.
Chì fà
A genesi di l’anni sessanta. Una canzona simbolica, firmata in u marmaru di a memoria cullettiva cum’è quella questione suspesa, chì cheria una risposta angusciata, addisperata, omancu ch’ella fussi bramata a mossa ch’ella cumandava, è chì vense. Sò l’ore di e prime lotte salutifere, è fundatrice di tante mubilizazione future. L’Argentella contr’à e prove nuclearie, i fanghi rossi, contr’à a spuliazione è l’avvilimentu, fussi materiale o mentale. Arricurdatevi.
Simu sbanditi
Invece ch’ellu intendia, un putere centrale sordu è inflessibile, di sottumette ogni diversità è impone a lege d’una pianificazione digià scritta, nasce è si spanna a riflessione intellettuale nù i chjerchji studientini di u Cuntinente. Da ste prime fiaccule s’hà da sparghje una infiarata di rivendicazioni, di desalienazione è d’aspirazioni. Da tandu, ùn serà mai più nunda cum’è nanzu. State à sente stu testu di Ghjuvan Teramu Rocchi, s’averebbe da dì, stu manifestu, vale centu discorsi. Dice tuttu : a ripressione culturale, a spuliazione di e terre, l’esiliu massicciu, l’ecunumia misera, a disparizione di u populu : « Simu sbanditi. »
À stu custatu bellu argumentatu chì torna à discità e cuscenze è chì torna à sveglià e lotte seculare d’un populu maiò, chì inventò una demucrazia piuniera è antivista, succede un’esurtazione à a lotta. U rinnovu di u Settanta, cù a so leva di scrittori, artisti, teatrini, militanti assuciativi è canterini ci ghjoca una parte tamanta è loda u ceppu di a mossa : a sucetà paisana depusitaria d’un’identità millennia chì intende d’affirmà i so dirritti inalenievuli.
U Culombu, innu di e prime mosse A rivolta U ricusu istantaratu è intransigente di u Statu giacubinu hè simbulizatu da u so missiunariu Libert Bou, caricatura di a pensata culunialista chì accerta in 1973 : « duiecentumila Corsi autunumisti ùn puderanu cambià a lege francese. » U bluccame decretatu avvampa l’isula d’un incendiu di rivolta. Eccu ghjunte l’ore di e prime strage. S’imballa a Storia è u mondu sanu scopre u prublema corsu in u 75 cù l’evenimenti d’Aleria. Da a scena di guerra ingir’à e vigne di u scandalu à e vinti mila manifestanti per a liberazione d’Edimondu Simeoni in Bastia, trè canzone chì ritraccianu quelle stonde pregne di sulennità. (5,6,7)
Clandestinu
Pettu à a fermezza ceca di u Statu s’affìrmanu e prime radicalizazioni. Militanti più giòvani, più decisi s’ingàgianu in una lotta palatina. I mezi è e rivendicazioni sò altri. Eccu l’ore di e scelte.
Quand’ì a terra move
Certi testi più ch’è d’altri làscianu a so stampa nù un’èpica precisa. Simu sbanditi ch’è n’emu ascultatu nanzu dicìa i fundamenti di una lotta, «Quandi a terra move » di Ghjàcumu Fusina, gran scrittore nustrale, mughja a so speranza è e so certitutini. Una pensata per Dumènicu Gallet chì ne fù l’inparagunèvule interpretu.
Ghjennaghju
In 1980, schjatta l’affare di Bastelica Fesch. I barbusi, a ripressione, un ambiante di guerra civile, i morti in carrughju, è sempre a cicaghjine d’un Statu ch’ùn vole sente nunda. À mez’à st’apucalisse, a voce degna è curagiosa d’un vescu umanistu, cristianu sì, chì e parolle di pace è di sennu appacionu e mente è prediconu e vie di un diàlocu custruttivu. Ghjennaghju.
Cum’è un soffiu di libertà
Cù u cambiamentu pulìticu in Francia, nasce qualchì speranza d’evuluzioni cunseguente. E prime riforme strutturale di statuti detti «particulari », puru ch’elli ùn bastonu manc’appena à suddesfe e brame è risponde à l’inghjochi stòrichi marconu quantunque l’èpica di e prime cunquiste.
Ci hè dinù
Mez’à a strutturazione pulìtica chì s’amplifigheghja, l’anni Ottanta anu da assignalà, dinù, a vuluntà d’apertura à u mondu. À l’internaziunale, tante lotte di pòpuli minuritarii ci rimàndanu, nù a spechjata, a fiura di lotte surelle, emancipazioni dulurose è attempu, incuragimenti in parangone. Cù una dèdica speziale, sta sera, à i nostri fratelli catalani è baschi venuti, una volta di più à testimuniacci a so calurosa sulidarità.
Catena
In Memoria
Annate d’errenza, d’affrontu fraticidiu : stonde tràgiche chì vene sempre cusì diffìciule à parlanne. Senza piattacci nunda nè facci falà a pannella à l’ochji, una pensata pùdica è cummossa à quelli chì paconu u tributu nant’à e viacruci sanguinose di stravviate spaventose.
Golu
È sè no ci mettìssimu appena à sunnià ? È s’elli cambièssinu un ghjornu i raporti trà di i Stati suprani è i pòpuli senza nazioni ? A superba di i putenti si viderà mai mutà intelligenza ? Cumprensione ? Un federalìsimu eurupeu, un veranu arabu, una brama universale di libertà ? Quale chì a pò sapè ? Eppuru simu quì A lotta seculare di u pòpulu corsu hà mantenutu u miràculu di a so sopravivanza. In e tenebre di l’ore scure, luce sempre a fiàccula irreduttìbile di a vuluntà, a sperenza hè l’ultima à more dice un pruverbiu nustrale. Una vuluntà di resiste, d’ùn esse ridottu à u scordu sempiternu, di rifusà una smarrizione imposta, un messagiu à l’universale da mantene a ricchezza di a diversità. Eppuru simu quì.
A lingua di i mei
«Morta a lingua, mortu u populu. » Stu vechju mottu presente nù a lotta naziunalista da e prime mosse dice a primura di a cultura da cimentu di a sucetà. I primi acquisti linguìstichi si fècenu in l’anni settanta cù u mondu assuciativu, mintuemu per u indettu à Scola corsa. Po vensenu i primi corsi nù u sistema sculare, a creazione literaria, l’apertura di l’Università, a presenza di a lingua nù i media. Da u latu pulìticu, duie date sò firmate assignalate: u votu nant’à a cuuffizialità à l’Assemblea di Corsica di maghju 2013 è u votu ottenutu à u parlamentu eurupeu nant’à e lingue minuritarie qualchì mese dopu, cù u travagliu renace di u deputatu Francescu Alfonsi. «A lingua di i mei » per ramintacci ch’ellu hè sacru u nostru parlà è chì, più ch’è mai ci tocca à difèndelu è à spannallu
Corsica
Dopu à e strage, nanzu ammintate, ch’insanguinonu è culpinu d’un dolu funestu a lotta, nasce un trattu di creazione affrancata da l’esigenza militante è d’un pesu greve. Micca una rumpitura nò, una distanzazione benefica chì libereghja a sensibilità artistica è chì inghjenna una pruduzzione diviziosa. Indè st’aspirazione à cantà un mondu idealizatu da u pueta si ghjoca digià, dinù, a muta pulitica in gestazione.
Sinfunìa Nustrale
Qualcosa hè cambiatu, tutt’ognunu a sente. Traghje un soffiu novu. Una brama entusiàstica, prufonda, un’aspirazione à custruì, à andà indavanti, à ingiardinà l’avvene. Una canzona, scelta da innu di campagna, venerà à traduce è incarnà sta fiumara criscente. Una sinfunia, nustrale è d’altrò à tempu, cum’è una simbòlica ricca di tanti sensi. Turnemu à vucà inseme nant’à stu battellu scemu chì ci purtò nant’à ripe lussuriante.
Mi ne vocu
A speranza s’hè discitata è piglia suchju, sempre di più. Quellu ghjornu d’allegria aspettatu dapoi tant’anni, chì certi s’addisperàvanu d’ùn vede mai più, s’avvicina, ci tende e bracce è, cum’è per mirà culu, accade, nù un sonniu svegliatu chì ci smaraviglieghja sempre oghje ch’hè oghje. «Mi ne vocu », canzona di brama è di fede, ci porta sempre cù a so forza cuntagiosa è i ricordi splendidi chì li sò oramai affibbiati.
L’affissu
Vuliamu compie sta seratina cù una canzona d’un artistu maiò chì hà arricatu tantu à a cuscenza cullettiva. Ghjuvan Paulu Poletti scrisse sta canzona in u 1980, quand’elli traghjianu i venti di cambiamentu di e prime riforme strappate à un Statu monoliticu. Oghje risònanu e so parolle cù un chjoccu reattulizatu. Tocca à noi, più ch’è mai, à edificà a sucetà chè no bramemu, ghjusta, cunfraterna, aperta, accugliante, nustrale, ottimista, prugressista. È ch’elle sianu e più belle, e pàgine di Stòria chì ci fèrmanu à scrive, tutti, in l’avvene. «Cusì bella terra induve dumane mi ne vò» : l’affissu. »
A serata s’hè compia ben intesa cù u Diu vi Salvi Regina.
Arritti ringraziegha à tutti i cantarini per avè ci fattu l’amicizia di a so presenza è u piacè maiò di sta bellìssima serata di ramentu di ssi 50 anni ch’anu fattu a storia d’Arritti. 50 anni dopu, un antru mughju hè lampatu, quellu di cuntinuà sta strada aperta, cù e scumesse di a presa di rispunsabilità è a brama ingorda di custruisce u nostru paese.
* Petru Santu Guelfucci, Petru Guelfucci, Ghjuvan Paulu Poletti, Canta 73, Anna Rocchi, Doria Ousset, Felì, Michelina Sammarcelli, I Chjami Aghjalesi, Mai Pesc,e Paulu Felice Nasica, Babetta Bottalico, Ghjuvan Marcu Fabrizi, Diana Salicetti, Francescu Filippu Barbolosi