Hà campatu ind’un pullinaghju di Valle di Mezana, una gallina un pocu strana…
Tutte e matine facìa un ovu in oru…
Madama Gallò-Gallì, si valìa un tisoru. Cù un tal’ovu ci hè da campà di Gran’Signore.
Ci hè da cumprà, si t’ai calculatu, ottu porri, sei zucchette, duie melinzane à u marcatu.
È sè tù ti sai misurà in le spese, poi quasi magnà a ligusta, una volta à u mese…
Ma u paisanu di divintà riccu era in tichju, vulìa a so villà in Toga, o in Purtichju, o forse à e Sanguinare o à Santa Lina.
Senza più riflette, hà strippatu a gallina…
Avìa pigliatu u viziu di certi imprisarii, chì vòlenu divintà prestu prestu milliardarii…
Ovu in oru, hà compiu d’avenne.
Cridìa di truvà un tisoru, hà truvatu e so antennee. Addìu l’oru, adieu le pèse, varca el flous, di a gallina si n’hà fattu un couscous…
Muralità
In Francia hè più miraculosu u Tisoru…
Hè un gallu, chì face l’ove in oru. •