Una settimana una parolla. (O duie, o micca, sfidàtevi di e « parolle parolle parolle…»)
Eiu sò a stàntara,
Ricolla à a prestoria :
In questi i tempi passatoni
era una muntagna fiera ;
po un scogliu altieru ;
Dopu una petra superba ;
E fatta fine sò diventata
Una stàtua maravigliosa.
Eiu sò a stàntara,
L’omi chì campàvanu
Cinque milla anni fà
M’anu scultata
A faccia eppò u corpu :
Arechje, ochji,
Labre, petti è cannella.
Eiu sò a stàntara,
Ma s’hè passatu qualcosa
chì mi toglie
U pudere augurale
chì èsce sempre avà
Da l’altre stàntare corse.
Eiu sò a stàntara,
Quella chì hè mozza :
U fattu si stà chì
Per sfurtuna,
Un’arechja meia
S’hè staccata
Appena principiata
A zuccatura.
Eiu sò a stàntara,
Or’dunque, a mo faccia
Hè di traversu
È invece di guardà u levante,
Segnu di vita,
M’anu girata ver’di u punente,
Vale à dì : a morte !
È u locu t’hà pigliatu
U nome di marconcellu,
Podassi una forma spùtica
Per « malcuncigliu ».
Eiu sò a stàntara,
A più vechja di Còrsica.
Curava i cuntorni
Chì c’èranu l’omi ;
Guardava a surghjente perenne ;
Fighjulava i chjerchji è e teppe
fatti di petre tamante
È chì fèrmanu oghje misteriosi.
Eiu sò a stàntara,
U Papa m’hà cundannata :
A nova religione
Ùn pudia soffre l’ìduli ;
M’anu tagliatu in trè pezzi
È giratu a faccia in tarra.
Eiu sò a stàntara,
Ma ognitantu,
Mi rivoltu
Da guardà e stelle
Stracquata à mezu
À u lamaghjone,
Cù vacche è sumeri
À l’ingiru
Chì anu pigliatu
A piazza di l’òmini
Eiu sò a stàntara,
A stàntara chì s’arrizzava
Oghje chjinata ind’un pratu
Vicina à un’ochju,
Ind’un locu chjamatu
Teghja di Linu.
Eiu sò a stàntara,
Sapete, u Linu,
U capimachja
Chì annunziava
A morte à l’omu
Chì pigliava
Senza riflette
A candella maladetta.
Eiu sò a stàntara,
S’è vo mi vidite,
Fate u piacè,
Abbiate una pinsata
Per issa ghjente chì
M’anu datu a vita.
Marina Chovin.