L’autore di stu rumanzu t’hà dighjà stampatu più di 25 òpere. Cunnosce dunque e règule spùtiche di u « polar » (d’appressu à Wikipedia, Il polar è un genere cinematografico e letterario, neologismo francese nato dalla fusione dei termini poliziesco (policier) e noir). Questu u libru mette in ballu dui pulizzeri chì anu dighjà scioltu parechje inchieste inseme : François Le Duigou è Phil Bozzi. Piazzati à u cummissariatu di Lorient, ritròvanu à Pierrot, sprizzatu da i so culleghi, ma chì riesce quantunque propiu bè cù i so dui amichi.
A stòria hè veradimente aggradèvule : dui morti in pocu tempu, cù sumiglienza chì ci face pinsà chì sò stati tombi da u stessu omu, ma chì a raghjone hè bughjosa. U fattu si stà chì i dui morti, Florient Le Rouho è Giovan Gastaniani dettu Gigi, sò stati marturiati. U sicondu mortu era corsu, cum’è Phil Bozzi, è u spiazzamentu in l’ìsula hè unu di i mumenti più interessanti di u libru. Si scopre un imprese familiale di vèndita di battelli, chì t’hà un uffiziu in Còrsica, in Marseglia è in Lorient : u rispunsèule hè Pàolo Gastaniani, a so figliola Michèle, e duie figliuline, u sposu è u mortu : Gigi.
Ma chì ghjè u ligame trà i dui morti ?
Si tratta d’un tràfficu tremendu di droga, chì hè mandatu in Lorient per via d’una cumbrìccula tercana. Ind’u soprapiù, c’èntrenu e vìttime ind’un ghjocu di géocoching (Le géocaching (ou geocaching) est un loisir qui consiste à utiliser la technique du géopositionnement par satellite (GPS) pour rechercher ou dissimuler des « caches » ou des « géocaches », dans divers endroits à travers le monde). Eccu dunque una stòria cumplessa ma micca troppu, chì dà à u lettore a voglia di cunnosce a fine.
Ma stu rumanzu si vole dinù didàtticu : un simu micca ind’una seria mericana : da ottene i risultati di l’autupsia ci vole ad aspettà ; ci vulerebbe à stallà camerà di surveglianza da per tuttu cum’è in Inghilterra ecc. Ma u scopu di stu libru hè dinù di facci cunnosce a Còrsica. Or’tandu, si leghje une poche d’infurmazione false è d’astre lochi cumuni : s’impara chì Bozzi si dice Bozz’, Phil spieca chì ghjè u prublema di l’indivisione, ci conta a passata di Vannina d’Ornano ecc. Lighjendu tutte st’infurmazione, ci si pare di leghje l’enciclopedia, surtemu da a stòria spùtica di u rumanzu, s’ampara fatti senza impurtanza per scioglie l’affare. D’altronde, ci hè qualchì sbagliu ind’a puntuazione è ind’a sintassa stessa. Ghjè un bellu peccatu perchè ci caccia u piacè di a lettura.
Eccu dunque un veru polar chì a stòria hè attraente, ma chì li manca una rilettura più scrupulosa.
Marina Chovin.