Scrittu da Ghjuvan’Tèramu Rocchi in u 1989, ssu cantu serà quellu chì ferà veradimente cunnosce à Felì, ugnunu ricunniscèndusi ind’è ssa rabbia di campà sparsa cusì bè da a so voce per dì e brame d’avvene di u pòpulu corsu. Arritti u dedicheghja à a nostra ghjuventù, campate ssa rabbia di vita ancu voi, è campate felice o zitè !
Campà di u tempu custentu
Campà ogni stonda nascente
Campà di brama à u presente
Cun tè campà eternamente
Campà luntanu di l’indecisu
Campà senza chèrene avisu
Campà di listessu surisu
Cun tè campà u paradisu
Campà dà ti a tenerezza
Campà d’infinita carezza
Campà di l’amore chì ùn svezza
Cun tè campà senza amarezza
Campà l’infernu è a prigione
Campà a più grande passione
Campà u core à sulleone
Cun tè campà for di ragione
Cun tè di u tempu custente
Cun tè ogni stonda nascente
Cun tè di brama à u presente
Cun tè campà eternamente. •