«Guarda Fratellu ! » hè una mostra magnìfica chì conta a nostra stòria cuntempurànea. Hè nata da un Cullettivu animatu da Andria Fazi, maestru di cunferenza in Scienze Pulìtiche, Petru Paulu de Casabianca, ch’hà fundatu u situ stuzzicaghjolu apiazzetta.com, Sarah Defranchi, cuurdunatrice di Lingua Scritta ch’hè l’associu chì porta u prugettu, Vannina Bernard-Leoni, ch’hà fundatu a rivista Fora !, è Léa Eouzan-Pieri, futtugraffa ducumentarista, cioè un gruppu di personi
appassiunati di stòria è d’evenimentu, è di ssu mezu uriginale di spressione : l’affissu ! • Donu o imprestu, l’affissi sò state racolte da pudè fanne mostre itinerante, sparghjendu ssu messagiu d’una stòria ricca è cumplessa. • Petru Pàulu de Casabianca ci conta ciò ch’ella porghje cum’è insignamentu è i scopi ch’ellu ricerca cù i so cumpagni.
Chì ghjè ssa mostra «Guarda fratellu ! »?
Cumu ci site ghjunti ?
PP de Casabianca : Ci hè vulsutu trè anni di ricerche è avemu racoltu 400 affissi. L’idea hè nata in u 2014, vale à dì un’eternità tantu ci sò stati cambiamenti pulìtichi dapoi ! Francescu Diani ci face rigalu di a so cullezzione d’affissi pulìtichi chì anu ghjuvatu à illustrà u so libru nant’à Canta u Populu Corsu, esciutu in u 1993. Nasce allora l’idea di cuntinuvà a racolta d’affissi corsi esciuti da l’anni 70 à 90. Oghje, ne semu à 400 affissi ricensati è fotografiati. Seranu messi in lìnea nant’à u situ «Guarda fratellu » è ne prisentemu una sessantina à traversu una mostra chì si spassighjerà.
Induve è quandu ? 
Saremu da u 7 à u 30 di ghjennaghju à L’Alb’oru in Bastia, da u 16 di ferraghju à u 25 di marzu à a BU di Corti… aspettandu d’altre date è d’altri lochi…
Perch’è avete sceltu st’èpica da u 70 à u 90?
Sfuglittendu l’affissi pulìtichi corsi di l’anni 70 à 90, vulìamu fà scopre ssu pezzu di stòria. Cù l’affissi, sò nate mubilizazioni chì anu cambiatu in prufundezza a sucetà corsa. Hè un’èpica ricca, di cuntestazioni, di sperenze cullettive maiò, ma dinù di tensioni è di viulenze. Hè un’èpica mal cunnisciuta dinù, spessu idealizata è mitificata. St’èpica hè stata una brama di cambiamentu, una sperenza maiò. Sò nate cusì idee nove : difesa di a lingua corsa, difesa di l’àmbiu di pettu à i prugetti di tuttu turìsimu, difesa d’una identità percepita cum’è minacciata. A sucetà corsa sana hè tocca da stu soffiu novu. Ùn si pò mancu ammintà a creazione culturale, tantu sò stati numerosi i gruppi di cantu, e raprisentazioni teatrale, i libri esciuti. Sò create in ogni locu fiere rurale è l’artigianatu si sviluppa. Si rinforza a rivendicazione pè a creazione di l’università di Corsica, si parla d’ecunumia di pruduzzione. Tandu l’affissu piglia una piazza essenziale in a cumunicazione (internet ùn esiste micca…) è in a sparghjera di st’idee.
Ssa mostra hè un mezu di fanne u bilanciu ?
Ùn hè quì u nostru scopu. Tuccherà à i stòrichi, à l’universitarii. Parechje idee minuritarie tandu sò oghje cumune à una magiurità di a pupulazione. È s’ellu si pò pensà chì oghje ci sò state avanzate, ci sò stati dinù dillusioni. I paesi di l’internu sò à l’agunia, e custruzzioni cuntinuvèghjanu à fiurisce in piaghja, a pràtica di a lingua corsa cala, a miseria hè crisciuta di manera tremenda. U scopu di u nostru prugettu ùn hè micca d’idealizà, di glurificà o di celebrà qualcosa. Ma di piglià u tempu di riflette è di capisce st’èpica chì hè stata forte è piena di sogni ma dinù di dillusioni, per tutti quelli chì l’anu vissuta.
Dinù un mezu di vultassi nant’à cinquant’anni di lotta naziunalista ? 
In u 1966, nasce u FRC (Front Régionaliste Corse). Situatu à manca, dinunzia u culunialìsimu è u liberalìsimu ecunòmicu. Ùn averà mai una basa impurtante di militanti. Ma ghjoca un rollu decisivu in a storia di u naziunalìsimu, di u sviluppu di e so idee è di l’elaburazione d’una duttrina regiunalista cù a publicazione in u 1971 di u libru «Main basse sur une île », scrittu da Carlu Santoni è Pasquale Marchetti. L’ARC (Action régionaliste corse) nasce in u 1967. Piglia a seguita di u CEDIC (Comité d’étude et de défense des intérêts de la Corse) fundatu trè anni nanzu da Max Simeoni è Paul-Marc Seta. L’ARC rompe cù u FRC ch’ellu trova troppu pulitizatu. Preferisce esse « nè di diritta, nè di manca », mentre chì i militanti di u FRC accùsanu l’ARC di « poujadisme corse » è d’accumudassi di l’ecunumia liberale. Sùbbitu l’ARC piglia a bandera di a lotta contr’à u sottu sviluppu ecunòmicu di l’ìsula è u custatu d’abbandonu. U so discorsu piace. Vene prestu u tempu di i grandi cungressi di l’estate à u Cateraghju (à a famosa sala di « La Clé des chants ») è in Corti induv’ellu si canta «U Culombu» à a fine di i meetings infiarati. In u 1973 l’ARC diventa «Azzione pè a rinascita di a Corsica ». Hè girata a pàgina di u regiunalisimu, oramai si parla d’autonomìsimu.
Ci hè una parte cunsacrata à « e Ghjurnate corse » di Corti ?
Nata à u principiu di l’anni 70 à l’iniziativa di Ghjuvanghjàcumu Albertini, s’hè chjamata prima «matinata corsa » nanzu di diventà « ghjurnata corsa » è infine «università d’estate». E «Ghjurnate corse» piccianu focu è cunnòscenu un successu ràpidu. Sò organizati dibàttiti, corsi di stòria è di lingua, mostre, cuncerti. Si torna à scopre una cultura sminticata è si riflette à a Còrsica di dumane. Ma e «GCC» pòrtanu dinù qualcosa di novu in a sparghjera di l’idee. Antivisti, l’organizatori crèanu un giurnalettu, svilùppanu un merchandising mudernu (e famose magliette « università di Corsica »…), si «delucalizèghjanu » in parechji paesi (76 è 77) è mèttenu in piazza ancu un… giurnale televisìu ogni sera ! L’università d’estate compie in u 1977. A lotta si ferà oramai nant’à d’altri terreni. L’università d’estate averanu cuntribuitu assai à a sparghjera di l’idee naziunaliste in a sucetà corsa.
Un messagiu forte : a difesa di a lingua ? 
Cù a rivendicazione di a creazione di l’università, a difesa di a lingua corsa hè una di e primure di a mossa di u settanta. In u 1971, Ghjuvanbattista Stromboni crea l’associu Scola Corsa. Si dumanda a stesa di a lege Deixonne (hè autorizatu l’insignamentu di e lingue « regiunale » di Francia fora di u corsu, l’alsazianu è u fiammingu). Serà fatta in u 1974.
L’associu mette in ballu corsi di lingua corsa chì cunnòscenu un grande successu. Sò create parechje sezzioni : in Bastia i piunieri sò Carlu Castellani, Ghjuvancarlu Antolini, Ghjuvanni Chiorboli, Francis Beretti. In Parigi sò Dumenicantone Geronimi, Pasquale Marchetti, Rinatu Coti. In u 1970 nasce dinù l’ADECEC (Association pour le développement des études archéologiques, historiques, linguistiques et naturalistes du centre-est de la Corse) chì face un travagliu di ricerche è di publicazioni maiò di libretti è di lèssichi. Seranu creati ancu una radio è un museu in u paese di Cervioni.
L’affissi dinù còntanu a ripressione… 
L’azzione d’Aleria i 21 è 22 d’agostu di u 75 hè un evenimentu maiò di a segonda parte di u XXu sèculu. I mezi sprupurziunati mandati da u Statu culpìscenu l’opinione corsa. Si radicalizeghja u muvimentu naziunalistu è u 5 di maghju di u 1976 nasce u FLNC. À cantu à u currente autonomistu ci serà oramai un currente più radicale chì legitimeghja a viulenza clandestina. Hè u tempu di a ripressione, di i primi prucessi, di i prigiuneri. Hè dinù quellu di a sulidarità chì s’assesta cun l’associu A Riscossa. Hè dinù u tempu di a viulenza di u Statu. I muvimenti di « barbouzes » rivendichèghjanu azzioni contr’à i militanti naziunalisti, messi à palesu cù l’affare Bastelica-Fesch in u 1980. Cù a vittoria di Mitterrand in u 1981 s’apre un’èpica nova. I prigiuneri pulìtichi sò annistiati, apre infine l’università di Còrsica (prumessa dapoi u 1974). Una parte di u muvimentu naziunalistu avia chjamatu à batte a diritta. Hè creata l’assemblea di Corsica è si vota una prima volta à l’elezzione in u 1982. Una parte di u muvimentu naziunalistu ci participeghja (l’UPC d’Edmond Simeoni, u PPC di Dumenicu Alfonsi chì ferà lista cumuna cù u MCS di Carlu Santoni à u segondu giru). Micca i sustegni di u FLNC (a CCN: Cunsulta di i cumitati naziunalisti) chì pàrlanu di « tràppula » di u Statu francese.
Princìpianu quì e prime fratture ?
L’anni chì vènenu dopu sò quelli di a viulenza chì cresce. U statutu particulare di l’82 ùn basta à i sustegni di u FLNC chì si radicalizeghja. Cù l’assassiniu di u militante Guy Orsoni è a so vindetta (1983) una tappa hè francata. Hè tandu ch’ellu nasce l’associu CFR (Corse française et républicaine) chì piglia una grande impurtanza. È s’ella si sparte in dui l’opinione pùblica, si spacca dinù u muvimentu naziunalistu. L’usu di l’impòsitu rivuluziunariu hè criticatu. L’assassinii in Aiacciu di u cummerciante Schoch (1982) è di dui Tunisiani accusati di tràfficu di droga (1986) sò cuntestati da una parte di i militanti naziunalisti. E divisioni interne sbucceranu nant’à e sissioni di u 1989 (nàscita di l’ANC, Accolta naziunale corsa), è u 1990 (creazione di u MPA, Muvimentu per l’Autodeterminazione). Primi segni nanz’à e fratture di l’anni 90. Ma saria troppu riduttore di parlà unicamente di i naziunalisti cum’è attori di a mossa cuntestataria di l’anni 70 è 80.
Vale à dì ?
A mostra un affissu di u Parti Communiste Français, chì, un tempu, hà fattu sentu a so voce cù i naziunalisti per cuntestà u guvernu di Giscard è l’opere di i « barbouzes ». A Ligue Communiste Révolutionnaire hà ancu cunsacratu un affissu à a Corsica In quant’à i sucialisti corsi, una parte era vicinu di l’idee autonomiste. Ma hè sempre stata diffìciule di fà sente a so voce à cantu à i radicali di u MRG.
L’affissi ci còntanu dinù a difesa di a terra ?
Nata cù l’affare di e fanghe rosse (1973), a difesa di l’ambiu hè stata una di e primure di a mossa di u Settanta. L’anni 70 sò dinù quelli di i prugetti immobiliari sprupusitati (100.000 letti in A Testa Vintilegna, custruzzioni maiò previste in l’Agriate, in a punta di Capicorsu, in Balagna…) è i naziunalisti mèttenu in avanti a paura di a « balearizazione » di a Corsica. Ma purtà un sguardu nant’à l’anni 70 è 80 hè piglià cuscenza di a vitalità di a sucetà corsa. Sò create e fiere è i fucali rurali per rivittulisce l’internu. Sò creati sindicati di i travagliadori, d’insignanti, di studianti, d’agricultori, di liceani…
Eppò ci sò i drami…
decenniu chì ghjunghje dopu purterà u so lottu di bughjura è di doli. U 5 di maghju di u 1992 a Còrsica hè culpita da a catastrofa di Furiani. Impussìbule di spiccà a strage di Furiani da a pulìtica. Robert Sozzi, militante di u FLNC, hè tombu perch’ellu avia cuntestatu a direzzione di u muvimentu è criticatu e derive interne. Avia plasticatu e vitture di Jean- François Filippi, presidente di u Sporting Club di Bastia, è merre di diritta di a cumuna di Lucciana, Un cumitatu di sustegnu hè creatu, è Franck Muzy, u so portavoce serà assassinatu in Bastia. U 28 di ghjennaghju di u 1995, duiemila persone manifèstanu in Bastia daretu à un striscione « tumbà à Robert Sozzi è à Franck Muzy ghjè tumbà u populu corsu ».
U muvimentu naziunale si strappa…
Dui blocchi s’anu da affruntà : quellu di a Cuncolta Naziunalista — FLNC stòricu è quellu di u MPA — Canale abituale. Principiata u 6 di ferraghju di u 1995 cù l’assassiniu in Aiacciu di Jean-Pierre Leca, a « guerra » ferà una quindecina di morti. L’ùltimu attu serà l’attentatu à a vittura in pienu ghjornu nant’à u Vechju Portu di Bastia, u primu di lugliu di u 1996. « D’una lotta naziunale, n’aveti fattu un spavechju » scriverà Natale Luciani in a canzona Chjaruscuru di Canta u Populu Corsu, esciuta in u 2001. Ci vulerà à aspettà u 1999 per l’appacera.
Chì si passa tandu ?
In u 1999, l’accordi di Migliacciaru firmati durante l’estate da trèdeci urganizazioni naziunaliste màrcanu u principiu di ricunciliazione trà naziunalisti. À l’iniziativa di u Cumitatu di u Fiumorbu, l’accordi pruibìscenu a viulenza trà d’elli. Hè girata a pàgina di l’assassinii ma pesa u bilanciu di l’anni di piombu. L’èpica presentata quì hè quella di i grandi scambiamenti in a sucetà corsa. Hè una storia diffìcule è bisogna à piglià u tempu per capìscela cun tutta a so cumplessità. S’è no ùn pigliemu u tempu di piantacci una cria, di piglià a distanza necessaria, u rìsicu hè grande d’idealizà, di mitificà, o di scurdassi di l’episodii i più scuri.
Ringraziu maiò à i cullezziunisti, in particulare à Francescu Diani chì ci hà datu l’idea di purtà stu prugettu. Ch’elli sianu ringraziati mille volte l’Adecec, Carlu Castellani, l’Archiviu di Cismonte, Ghjuvanni è Ghjuvancristofanu Benedetti, Petru Poggioli, Didier Ramelet-Stuart, Xavier Tavera, Arritti, Ghjuvan Ghjacumu Albertini, Gilbert Maisetti, u Frac.