U gruppu Voce Ventu hè natu di 1995 da musicanti chì t’anu amparatu a mùsica ind’è a Scola di cantu di u tintu di Natale Luciani è avia principiatu à cantà incù u gruppu Canta u Populu Corsu. U so primu dischettu, Rughju di vita, esce di 2005. Ci vole ad aspittà cinque anni da chì u gruppu sorti u so sicondu dischettu, Di Culori è di sonii. Infine, sò passati torna sei anni prima di vede una terza òpara : Ci serà sempre un cantu. Eccu dunque un gruppu chì piglia u so tempu, è chì a struttura di u dischettu hè stata pensata da u primu versu sin’à l’ùltimu. Ci vole dunque à viaghjà frà ste canzone cum’è si seguita l’affreschi nentr’à una catedrale.
Quì, si passa dunque da a bandera sin’à una lèttera di Napuleone à Pasquale Pàoli. Questu u dischettu rende umaggiu à a natura corsa, non solu à a tarra, ma dinù à tutti i sensi chì si discètanu quand’è no chjappemu isse machje. In Ti vecu o la mio bandera, simu invitati à mubilizà i nostri cinque sensi : l’arechje cù « u chjoccu di a campana », « a risa d’un zitellu » o « a rima di u mio cantu ». A vista hè presente cù « l’altu fanale », « a stella ardente », o « u vechju campusantu ». L’odoratu s’affacca cù « u fiore chì si spanna » ; u gustu cù « a mio funtana », « l’abbracciu à issa terra » ; l’appaspu cù « ogni stàntara à u sole », « la manu chì si porghje ». Ma a fine di a canzone c’invita à una lettura nova chì piglia in contu i quattru elementi : l’acqua (« u fiume »), u focu (« a stella ardente »), l’aria (« u volu di l’altagna ») è a terra (« à issa terra ch’eo tengu tantu »). Si ritròvanu st’elementi ind’«O tarra ìsula matre » (« l’onde », « u primu ragiu », « torre inariulate », « scogliu »). Sta temàtica di l’elementi si ritrova long’à u dischettu (da vede dinù È vicinu à u mare, Pèsati avà o Basta un sùppulu d’amore). Ci sò dinù e grande lotte chì chjàmanu à a tulleranza : È more l’omu ci ramenta chì nimu pò piglià a vita d’un omu ; Manifestu ci palesa chì nunda pò fà tace u cantu di libertà ; Trà la leccia è l’olmu tratta di e viulenze fatte à e donne ; Ci sarà sempri un cantu ammenta i migranti. Da què dinù a piazza di a lotta ind’u dischettu : Lèttera à Pàoli è O Generale ci palèsanu un ghjòvanu Napulione partigianu di a lotta paolina, mentre chì Pèsati avà tratta d’un avvene à custruisce.
Sò duie canzone chì mintùvanu l’orìgine di u gruppu : Una manera d’esse un omu rende umaggiu à Natale Luciani, è L’aghjalesa à u gruppu I Chjami Aghjalesi. Di fatti, a trasmissione di i valori umani è di u sapè fà ùn deve micca sparisce.
Eccu dunque un dischettu di prima trinca, chì ci chjama à rispettà a tarra è l’omi, à luttà per campà. Allora sì, ci sarà sempre un cantu cioè una canzona è un scornu di libertà.