Durmendu, ninsun’frombu vi tribula, cum’è quellu di a mosca chì bula.
Era l’avisu di Lione, tribulatu da un muscone…
– Dìu sà duva ti sarè sposta, è veni à allisingà à mè… a fai apposta ? Scappa prestu è vai à spassu.
– O Liò… di i to cunsiglii, mi ne passu…
– O ma… sòrtimi di vìa, spezia d’incrochju…
– Eiu sò un incrochju ?
Muscone si lampa è li pizzica l’ochju. Lione cumencia à mughjà, l’ochju mezu chjusu… A mosca li sorte da sottu è li pizzica u musu. È pò… piglia altura, fala à rasu à rasu, face un « lupingu » è li entre in lu nasu !
Liò cumencia à starnutà, suffiendu cum’è un cudogliu (1)… piglia, è mena di mustacciu in lu scogliu… Tandu, a mosca ch’ellu cridìa crechja, si lampa par daretu è li mursica l’arechja.
Era scimitu, a pelle tutta croscia. Dà a dintata di fiancu… è si sbremba la coscia…
Ochji di fora lintava u fiatu, l’attaccu frumbava da l’altru latu. L’animali spavintati da i mughji è i lamenti, scappàvanu pinsendu : hè Carruggi (2) chì li caccia i denti.
È… gamba mìa… ricummandèndusi à i Santi frusteri è paisani, d’ùn truvassi nasu à nasu cù Andrìa Padovani…
Muralità
Sbarca musconi, puce è pidochji…
Tichjàteli bè… prestu vi cacciaranu l’ochji… •
- Cudogliu : mammiferu marinu maiò assai (dinò suffione, in francese : cachalot).
- Carruggi è Padovani : dintisti aiaccini, culleghi di l’autore.